Klukkan 15:11 í dag barst tilkynning til lögreglu um að sprenging hefði orðið í iðnaðarhúsnæði fyrirtækisins Pharmarctica á Grenivík og að húsið væri alelda. Slökkvilið Grýtubakkahrepps fór á staðinn og slökkviliðið á Akureyri sendi einnig bíla og mannskap.
Þá fóru sjúkrabílar og lögreglubílar frá Akureyri. Hópslysaáætlun Almannavarna var virkjuð og aðgerðarstjórn á Akureyri mönnuð. Kl. 15:39 var búið að slökkva eldinn í húsinu. Tveir starfsmenn voru fluttir á Sjúkrahúsið á Akureyri með brunasár. Þeir voru síðan fluttir með sjúkraflugi til Reykjavíkur þar sem þeir fá aðhlynningu á Landspítalanum. Fimm aðrir starfsmenn voru í húsinu þegar þetta gerðist og er unnið að því að þeir fái áfallahjálp.
Í húsinu fer fram framleiðsla á snyrtivörum, fæðubótarefnum o.fl. Rannsóknarlögreglumenn fóru á vettvang og gerðu frumrannsókn en frekari rannsókn bíður morguns. Rannsókn á orsökum sprengingarinnar er því á frumstigi og því ekki hægt að fjölyrða um þær á þessu stigi.
Umræða
