Varðandi frétt Fréttatímans í gær um heildsölu og dreifingu Símans á ensku úrvalsdeildinni í knattspyrnu. Kemur Heimir Örn Herbertsson, lögmaður Nova og sérfræðingur á sviði samkeppnisréttar, fram með eftirfarandi sjónarmið fyrir hönd Nova.
Tilvísun í Heimi Örn Herbertsson, lögmann Nova: ,,Samkeppniseftirlitið hefur í tvígang þurft að grípa inn í samkeppnishamlandi hegðun Símans gagnvart Nova vegna endursölu á Enska boltanum. Það er áhyggjuefni að sökum verkefnaálags og ófullnægjandi fjárheimilda geti stofnunin ekki sinnt rannsókn málsins frekar. Þetta sýnir hve mikilvægt það er að eftirlitinu séu tryggð nauðsynleg starfsskilyrði til að framfylgja af festu ákvæðum samkeppnislaga og standa þannig vörð um virka samkeppni til hagsbóta fyrir neytendur og samfélagið allt.“ – Heimir Örn Herbertsson, lögmaður Nova og sérfræðingur á sviði samkeppnisréttar.
Réttur Nova tryggður til dreifingar á Enska boltanum
,,Í júní 2023 beindi Nova kvörtun til Samkeppniseftirlitsins gagnvart Símanum. Tilefni hennar var sú ákvörðun Símans að neita Nova um endurnýjun á samningi sem gerði Nova kleift að selja neytendum aðgang að sjónvarpsrásinni Símanum Sport sem sýnir leiki í enska boltanum og tengt efni. Slíka áskrift hafa neytendur getað keypt af Nova á lægsta verði sem í boði er.
Með bráðabirgðaákvörðun Samkeppniseftirlitsins frá 16. júlí 2023 var tekið undir sjónarmið Nova og sú skylda lögð á Símann að framlengja samning fyrirtækisins við Nova um heildsölu og dreifingu á Símanum Sport. Áfrýjunarnefnd samkeppnismála hafnaði kröfu Símans um að fella bráðabirgðaákvörðunina úr gildi.
Samkeppniseftirlitið hefur þannig í tvígang þurft að grípa inn í samkeppnishamlandi hegðun Símans
Samkeppniseftirlitið hefur nú, með ákvörðun sinni í máli nr. 2/2024, tilkynnt að ekki sé þörf á framlengingu þessarar ákvörðunar þar sem Síminn hafi, eftir inngrip eftirlitsins, gert samning við Nova um framangreinda heildsölu og dreifingu sem gildir til júlí 2025. Þess ber að geta að þegar Síminn fékk fyrst útsendingarrétt á Enska boltanum árið 2019 hugðist fyrirtækið ekki verða við beiðni Nova um heildsölu- og dreifingarsamning að því efni. Þegar Samkeppniseftirlitið, að beiðni Nova, hóf athugun á þessari fyrirætlan Símans breytti Síminn afstöðu sinni og samdi við Nova.
Samkeppniseftirlitið hefur þannig í tvígang þurft að grípa inn í samkeppnishamlandi hegðun Símans gagnvart Nova vegna endursölu á Enska boltanum til að vernda samkeppnisskilyrði milli fyrirtækja og standa þannig vörð um hagsmuni og valkosti neytenda. Á hinn bóginn er áhyggjuefni að í framangreindri ákvörðun Samkeppniseftirlitsins kemur fram að vegna verkefnaálags og ófullnægjandi fjárheimilda geti stofnunin ekki sinnt rannsókn málsins frekar.
Framangreind aðkoma Samkeppniseftirlitsins og fjölmörg önnur dæmi úr fortíðinni sýna svart á hvítu mikilvægi þess að eftirlitinu séu tryggð nauðsynleg starfsskilyrði til að framfylgja af festu ákvæðum samkeppnislaga og standa þannig vörð um virka samkeppni til hagsbóta fyrir neytendur og samfélagið allt.“ Segir Heimir Örn Herbertsson, lögmaður Nova og sérfræðingur á sviði samkeppnisréttar
Heildsala og dreifing Símans á ensku úrvalsdeildinni í knattspyrnu
