Stúlknalið knattspyrnuakademíunnar Ascent Soccer frá Malaví hitti í gær Þórdísi Kolbrúnu Reykfjörð Gylfadóttur utanríkisráðherra og hélt fyrir hana kynningu. Stúlkurnar ferðuðust til Íslands til þess að taka þátt í knattspyrnumótinu Rey Cup sem fram fór um liðna helgi.
Drengjalið Ascent Soccer vakti mikla athygli með þátttöku sinni á mótinu í fyrra og nú ákvað akademían, í samstarfi við knattspyrnufélagið Þrótt, að veita stúlknaliðinu tækifæri til að taka þátt. Þetta er í fyrsta skipti sem stúlknaliðið tekur þátt í alþjóðlegu móti í Evrópu og er viðbúið að þátttaka stúlknanna muni sömuleiðis vekja mikla athygli heima fyrir.
„Það var einstaklega gaman að fá að hitta þessar frábæru fyrirmyndir. Þær veittu mér svo sannarlega innblástur og ég efast ekki um að ferðalag þeirra og þátttaka í mótinu eigi eftir að koma til með að valdefla stúlkur í Malaví og víðar,“ segir Þórdís Kolbrún.
Ascent Soccer veitir efnilegum knattspyrnuiðkendum aðgang að menntun og tækifæri til að stunda knattspyrnu við góðar aðstæður í Lilongwe, höfuðborg Malaví. Leiðarljós akademíunnar er að koma iðkendum í atvinnumennsku eða í nám erlendis á knattspyrnutengdum skólastyrkjum. Ascent Soccer hefur sett sér það markmið að ná kynjajöfnuði innan skólans fyrir lok árs 2025, en akademían er nú þegar leiðandi í þjálfun stúlkna í landinu og átti meðal annars fimm fulltrúa í A-landsliði Malaví sem vann COSAFA-mótið (Council of Southern Africa Football Associations) í fyrra í fyrsta sinn í sögu landsins. Þrátt fyrir framfarir er þátttaka stúlkna í knattspyrnu í Malaví afar takmörkuð og ýmsar hindranir sem standa í vegi fyrir þátttöku þeirra.
Ísland setur jafnrétti kynjanna í forgang í sinni þróunarsamvinnu og brást sendiráð Íslands í Lilongwe því vel við þegar Ascent Soccer hafði samband um mögulegt samstarf nú í vor. Stuðningur utanríkisráðuneytisins vegna þátttöku stúlknaliðsins á Rey Cup er liður í því samstarfi, en með stuðningi Íslands mun Ascent Soccer einnig halda hæfileikamót í samstarfshéruðum Íslands, Mangochi og Nkhotakota, sem felur í sér þátttöku rúmlega 1500 stúlkna á aldrinum tíu til tólf ára þar sem áhersla verður lögð á vitundarvakningu um menntunartækifæri sem geta fylgt íþróttaiðkun. Þá mun akademían skipuleggja tólf viðburði þar sem ungar stúlkur fá að heyra beint frá nemendum hjá Ascent, þar á meðal landsliðskonum, um mikilvægi náms og íþrótta og tækifærunum sem því geta fylgt.
