Slíkan neyðarsjóð þyrftu þeir sem lægstu laun og bætur hafa og skrimta

Ég var einn af þessum 30.000 sem kusu Flokk fólksins í síðustu kosningum, núna er ég einn af þessum 10.000 sem hafa yfirgefið flokkin en Maskína mældi fylgishrunið lóðbeina sem sýnir að einn af hverjum þremur eru farnir úr flokknum.

Fyrsta málið sem kom upp, var að flokkurinn tók ranglega við styrkjum upp á 245 milljónir og neitaði að endurgreiða þær, ef um hefði verið að ræða skjólstæðing t.d. Tryggingastofnunar eða Vinnumálastofnunar, hefði sá einstaklingur ekki haft neitt val. Inga Sæland reif bara kjaft og var dónaleg m.a. við fjölmiðlafólk og fleiri. Minnti á yfirganginn varðandi skóparið þegar hún hraunaði yfir skólastjóra í krafti ráðherrastöðu sinnar.

Hvernig myndu ráherrar lifa á þessum smánar bótum? – Sumir ráðherrar verða atvinnulausir fyrr en þá grunar!

Inga Sæland er með 2.487.072 kr. í laun á mánuði auk allra fríðinda á meðan Örorkulífeyrir er 335.128 krónur á mánuði fyrir skatt án heimilisuppbótar og atvinnuleysisbætur eru 364.895 krónur á mánuði fyrir skatta og gjöld miðað við 100% bótarétt. Leiga í landinu er um og yfir 300.000 – 500.000 kr.

Þingmenn og ráherrar hafa ofan á föst ofurlaun sín: Hús­næðis- og dval­ar­kostnaðargreiðsla: 194.300 kr. Álag á húsnæðis- og dval­ar­kostnaðargreiðslu: 77.700 kr. og Hús­næðis- og dval­ar­kostnaður vegna heimanakst­urs: 64.700 eða samtals 336.700 kr. til að borga sinn húsnæðiskostað. Eða jafn háa fjáhæð og við eigum að lifa á! Já, sumir eru jafnari en aðrir!

Hvernig myndu ráherrar lifa á þessum smánar bótum sem þeir telja að nægi öðrum? Inga Sæland hefur ekki lofað neinu um að hækka þessar smánarupphæðir en það geta jú allir orðið án vinnu í lengri eða skemmri tíma.

Sumir ráðherrar verða m.a.s. atvinnulausir fyrr en þá grunar, þegar þeir hafa svikið sína atvinnurekendur, sem erum við, fólkið í landinu, kjósendur! Ekki gleyma því !

Starfs­lo­ka­upp­gjör Ragn­ars hjá VR nam um 10.2 millj­ón­um króna en hann fékk greidd­ar 1.856.217 krón­ur fyr­ir störf sín sem þingmaður um síðustu mánaðamót. Ragnar Þór kaus eins og Inga Sæland, að hirða til sín þessa háu fjárhæð og nóta bene, hjón með um fjórar milljónir á mánuði hafa ekkert með neyðarsjóð að gera.

Slíkan neyðarsjóð þyrftu hins vegar þeir sem lægstu launin og bæturnar að hafa og skrimta. Hví telur þetta fólk að það sé nóg fyrir það fólk sem Flokkur fólksins segist vera að vinna fyrir á þingi, hafi um tífalt minna til ráðstöfunar um hver mánaðarmót? Það væri fróðlegt að fá svar við þessu opna bréfi!

Flokkur fólksins er orðinn að Elítuflokki og Fílabeinsturninn er svo hár að úr honum er ekki hægt að koma auga á okkur smælingjana sem þó lögðum á okkur að mæta á kjörstað og merkja við ofangreinda riddara Flokks fólksins með von í hjarta um breytta tíma, sem nú er brostin.

Laun og álags­greiðslur þing­manna

Ráðherra- og þing­far­ar­kaup: 2.487.072 

For­seti Alþing­is: 2.487.072

Þing­far­ar­kaup: 1.525.841

Álags­greiðslur:

Formaður flokks sem ekki er ráðherra: 762.921

Vara­for­set­ar Alþing­is: 228.876

For­menn þing­flokka: 228.876

For­menn nefnda: 228.876

1. vara­for­menn nefnd­ar: 152.584

2. vara­for­menn nefnd­ar: 76.292

Fast­ur ferðakostnaður í kjör­dæmi: 43.500

Fast­ur starfs­kostnaður: 58.000

Hús­næðis- og dval­ar­kostnaðargreiðsla: 194.300

Álag á húsnæðis- og dval­ar­kostnaðargreiðslu: 77.700

Hús­næðis- og dval­ar­kostnaður vegna heimanakst­urs: 64.700

Til­get­in laun þing­manns

Þingmaður sem einnig er einn vara­for­seta Alþing­is og þigg­ur all­ar greiðslur sem hann á rétt á sam­kvæmt bú­setu og öðrum for­send­um sem tí­undaðar eru að ofan fær þá greidd laun og álag með eft­ir­far­andi hætti:

1.525.841 í þing­far­ar­kaup

228.876 sem vara­for­seti Alþing­is

43.500 í fast­an ferðakostnað í kjör­dæmi

58.000 í fast­an starfs­kostnað

194.300 í hús­næðis- og dval­ar­kostnað

77.700 í álag á hús­næðis og dval­ar­kostnað vegna nauðsyn þess að halda tvö heim­ili

64.700 í hús­næðis- og dval­ar­kostnað vegna heimanakst­urs

2.192.917 krón­ur alls