Helstu atriði úr dagbók LRH frá 17-05. Þegar þetta er ritað eru fimm aðilar vistaðir í fangageymslu lögreglu. Alls eru 82 mál skráð í kerfinu á umræddu tímabili.
Lögreglustöð 1
Íþróttafélag kært fyrir að veita áfengi utandyra á íþróttakappleik.
Óskað var aðstoðar lögreglu vegna slagsmála í miðborginni og var einn aðili handtekinn fyrir að hlýða ekki fyrirmælum lögreglu. Hann sá sig knúinn til að hóta lögreglumönnum lífláti og var hann fluttur á lögreglustöð hvar hann var vistaður í fangaklefa þar til ástand hans leyfir að við hann verði rætt.
Þjófur gripinn við iðju sína í fataverslun í miðborginni. Afgreitt á vettvangi.
Tilkynnt um umferðarslys í Laugardal hvar bifreið var ekið í gegnum grindverk. Engar frekari upplýsingar um málið að svo stöddu.
Maður smyglaði sér ofan í sundlaug án þess að greiða og hagaði sér furðulega gagnvart öðrum gestum. Honum var gert að yfirgefa sundlaugina sem hann neitaði að gera og var því handtekinn og fluttur á lögreglustöð hvar hann var látinn laus að skýrslutöku lokinni.
Manni með vesen vísað á brott úr gistiúrræði í miðborginni.
Maður handtekinn í miðborginni en sá hafði verið til ama á veitingahúsi og ekki látið af hegðun sinni þrátt fyrir fortölur lögreglumanna. Fluttur á lögreglustöð og látinn laus að skýrslutöku lokinni.
Óskað var aðstoðar lögreglu á veitingastað í miðborginni vegna manns sem var vísað út en neitaði að fara. Sá var ekki viðræðuhæfur sökum ölvunarástands og neitaði að segja deili á sér. Hann var því handtekinn og fluttur á lögreglustöð. Vistaður í fangaklefa þar til ástand hans skánar.
Maður handtekinn í Hlíðahverfi grunaður um sölu og dreifingu fíkniefna. Vistaður í fangaklefa vegna málsins.
Umferðarslys í hverfi 104 hvar þrjár bifreiðar skemmdust og ein reyndist óökufær. Engin slys á fólki og bifreiðin dregin af vettvangi.
Ökumaður kærður fyrir að nota farsíma undir stýri en sá ók fram hjá fyrrgreindum slysavettvangi með síma sinn á lofti til að taka myndskeið af því sem hafði gerst.
Umferðarslys í miðborginni en þar hafði ökumaður rafhlaupahjóls slasast. Reyndist vera undir áhrifum. Flutt á slysadeild til aðhlynningar sem og sýnatöku.
Maður handtekinn í miðborginni grunaður um meiri háttar líkamsárás. Fluttur á lögreglustöð og hótaði ítrekað að drepa lögreglumenn. Vistaður í fangaklefa vegna málsins.
Lögreglustöð 2
Ökumaður kærður fyrir að aka án gildra réttinda. Afgreitt á vettvangi.
Tveir ökumenn handteknir grunaðir um að aka undir áhrifum fíkniefna. Hefðbundið ferli og lausir að sýnatöku lokinni.
Umferðaróhapp í hverfi 220. Minni háttar skemmdir og engin slys á fólki.
Ökumaður handtekinn grunaður um ölvunarakstur. Fluttur á lögreglustöð og laus eftir sýnatöku.
Lögreglustöð 3
Tilkynnt um rán í hverfi 109. Málið er í rannsókn.
Ökumaður kærður fyrir að aka á 111 km/klst í hverfi 200 hvar hámarkshraði er 50 km/klst. Fluttur á lögreglustöð hvar hann var sviptur ökurétti vegna málsins.
Tilkynnt um bifreið úti í móa í hverfi 109. Reyndist vera umferðarslys og var ökumaðurinn aðstoðaður.
Tilkynnt um að bensínsprengju hefði verið kastað í vegg sem var skemmdur eftir atvikið. Málið er í rannsókn.
Lögreglustöð 4
Ökumaður kærður fyrir að aka á 149 km/klst í hverfi 113 hvar hámarkshraði er 80 km/ klst. Afgreitt á vettvangi.
