Saksóknari hjá embætti ríkissaksóknara sakaður um húsbrot, eignaspjöll, þjófnað og brot gegn barnaverndarlögum. Konan dró játningu sína til baka og starfar ennþá hjá embættinu en Ríkissaksóknari aðhefst ekkert
Kona sem er saksóknari hjá embætti ríkissaksóknara var á síðasta ári kærð og sökuð um húsbrot, eignaspjöll, ofbeldi, þjófnað og brot gegn barnaverndarlögum. Hún er enn starfandi sem saksóknari hjá embættinu. Greint er frá málinu í Morgunblaðinu í dag og þar segir að kærandi í málinu sé fyrrverandi eiginmaður saksóknarans.
Konan játaði brot sín við yfirheyrslur hjá lögreglu en dró játninguna til baka þar sem hún bar við erfiðu andlegu ástandi. Þá kemur fram í frétt MBL að konan sé enn í starfi hjá embættinu og að Sigríður J. Friðjónsdóttir ríkissaksóknari hafi ekkert aðhafst í málinu.
Sökuð um að hafa beitt móður kæranda og son líkamlegu ofbeldi
Samkvæmt heimildinum Morgunblaðsins kemur fram að lögregla hafi haft málið til rannsóknar sem og rannsókn á atviki þar sem saksóknarinn er sakaður um að hafa beitt móður kæranda og son líkamlegu ofbeldi.
Þá segir að viðkomandi saksóknari hafi flutt að minnsta kosti tvö mál fyrir Landsrétti sem vörðuðu umferðarlagabrot á sama tíma og hún bar fyrir sig andlegum veikindum. Í báðum tilvikum voru sakborningar dæmdir til fangelsisvistar.
