Atvinnuveganefnd lauk í síðustu viku umfjöllun sinni um frumvarp sem kveður á um niðurfellingu á kvótakerfi í grásleppu. Grásleppa var sett í kvótakerfið árið 2024 og var vertíðin 2025 sú fyrsta og eina sem fór fram í kvótakerfinu.
Úthlutun á kvóta til fiskveiða er aðeins úthlutað til eins árs í senn til kvótaþega gegn leigugjaldi í formi veiðigjalda, í öllum fisktegundum við Ísland og myndar engan eignarétt því að um sameign þjóðarinnar er um að ræða samkvæmt 1. grein laga um stjórn fiskveiða. Því getur hvaða ríkisstjórn sem er, lagt kvótakerfið niður í heild sinni eða að hluta eins og nú er gert með einu pennastriki.
Gert ráð fyrir að kvótakerfið verði lagt niður
Frumvarpið, sem Lilja Rafney Magnúsdóttir er fyrsti flutningsmaður að, gerir ráð fyrir að kvótakerfið verði lagt niður og í staðinn fyrir kvótakerfi, verði dagakerfi tekið upp í veiðum á grásleppu eins og hefð er fyrir.
Áhyggur af samþjöppun eins og umdeild er í gamla kvótakerfinu
Sigurjón Þórðarson, þingmaður Flokks fólksins og formaður atvinnuveganefndar, er meðal flutningsmanna frumvarpsins. Í aðsendum pistli sem birtur var í Morgunblaðinu á laugardag tekur hann undir áhyggjur smábátaeigenda. „Sporin af framseljanlegum kvótum í öðrum tegundum hræða,“ segir Sigurjón í pistli sínum og bendir á að slíkt fyrirkomulag hafi áður leitt til samþjöppunar.
Hvar eru baráttumenn fyrir frelsi einstaklingsins?
200 mílur hjá Mbl. vakti athygli á málinu og þar kemur einnig fram að Sigurjón segi mikilvægt að tryggja nýliðun og að dagakerfið bjóði upp á greiða leið fyrir alla þá sem hafa áhuga á að stunda veiðarnar. Þá lýsir hann eftir pólitískri samstöðu: „Það hefur komið mér á óvart að ekki sé breið samstaða á Alþingi um málið. Sjálfskipaðir verðir sjálfstæðis og frelsis hafa jafnvel fullyrt að verið sé að skerða áunnin atvinnuréttindi. Hvar eru baráttumenn fyrir frelsi einstaklingsins og nauðsynlegri nýliðun í atvinnulífinu?“ Segir í frétt 200 mílna hjá MBL.
