Tveir eru alvarlega slasaðir eftir bílveltu á Suðurstrandarvegi í morgun. Þeir hafa verið fluttir með þyrlu Landhelgisgæslunnar á Landspítalann. Vísir greindi fyrst frá.
Bíllinn valt skömmu fyrir klukkan hálf níu í morgun. Ökumaður og einn farþegi voru í bílnum og einn þeirra hafnaði undir honum. Samkvæmt upplýsingum frá Brunavörnum Suðurnesja eru hálkublettir á veginum en tildrög slyssins liggja ekki fyrir.
Lögreglan á Suðurnesjum segir í Facebook-færslu að fjölmennt lið viðbragðsaðila frá Lögreglunni á Suðurnesjum, Brunavörnum Suðurnesja og Slökkviliði Grindavíkur hafi farið á vettvang.
Unnið sé að vettvangsrannsókn í samstarfi við tæknideild Lögreglunnar á höfuðborgarsvæðinu. Ekki sé unnt að veita frekari upplýsingar að svo stöddu.
Umræða
