Alma D. Möller heilbrigðisráðherra telur brýnt að skoða með haghöfum hvernig fækka megi veikindavottorðum og breyta verklagi við útgáfu þeirra með skilvirkni og gæði þjónustunnar að leiðarljósi. Heilbrigðisráðuneytið vinnur að því að fækka útgáfum vottorða og tilvísana til að draga úr skriffinnsku og hafa þegar verið stigin skref í þá átt. Markmiðið er að auka tíma lækna og annars heilbrigðisstarfsfólks til að sinna sjúklingum, bæta þannig aðgengi að heilsugæslunni og styrkja hlutverk hennar sem fyrsta viðkomustaðar fólks í heilbrigðiskerfinu.
Heilbrigðisáðherra hefur þegar fellt niður kröfu um tilvísun sem forsendu greiðsluþátttöku vegna þjónustu sérgreinalækna við börn með reglugerð sem tók gildi 1. júlí síðastliðinn. Þann 15. september síðastliðinn tók gildi reglugerð ráðherra um tvöföldun gildistíma tilvísana frá heilsugæslu vegna meðferðar fullorðinna hjá sjálfstætt starfandi sálfræðinga. Ráðherra benti á að þar væri verið að létta af óþarfa skriffinnsku sem stæði í vegi fyrir þjónustu og væri öllum til trafala. Í október kynnti ráðherra ákvörðun um afnám kröfu um tilvísun til sjúkraþjálfara og breytt verklag sem tekur gildi í apríl á næsta ári. Fyrir liggur að árlega skrifa læknar yfir 30.000 tilvísanir fyrir sjúkraþjálfun og telur ráðherra augljóst að tíma þeirra sé betur varið í bein samskipti við sjúklinga.
Heilbrigðistengd vottorð yfir 200.000 árlega
Í skýrslu ráðuneytisins Vottorð og vottorðavottorð (2024) kemur fram að vottorð gefin út af Landspítala og heilsugæslustöðvum á höfuðborgarsvæðinu voru samtals rúmlega 190.000 árið 2023. Á landsvísu eru vottorðin umtalsvert fleiri, því sambærileg vottorð eru gefin út á heilbrigðisstofnunum um allt land og á Sjúkrahúsinu á Akureyri.
Langflest vottorð vegna veikindafjarvista
Samkvæmt skýrslunni voru langflest vottorð heilsugæslustöðva á höfuðborgarsvæðinsu vegna veikindafjarvista frá vinnu eða um 40.000. Í flestum tilfellum óskar einstaklingur eftir slíku vottorði að beiðni atvinnurekanda í kjölfar veikindafjarvista. Væri þessi fjöldi vottorða afgreiddur með tímabókun hjá lækni þyrfti um 10 stöðugildi lækna einungis til að sinna þessu verkefni hjá Heilsugæslu höfuðborgarsvæðisins samkvæmt upplýsingum frá stofnuninni.
„Það blasir við að útgáfa veikindavottorða tekur mikinn tíma lækna frá því að veita fólki raunverulega og mikilvæga heilbrigðisþjónustu í samræmi við grundvallarhlutverk heilsugæslunnar. Það þarf að breyta þessu kerfi, það er í allra þágu og því hef ég falið sérfræðingum ráðuneytisins að ræða hugmyndir að slíkum breytingum við haghafa“ segir Alma D. Möller heilbrigðisráðherra. Hún bendir á að fyrir hendi séu viðurkenndar aðferðir sem hafa skilað betri árangri en vottorðaskil vegna veikindafjarvista starfsfólks. Dæmi um slíkar aðferðir eru fjarverusamtöl á vinnustað, notkun ýmissa kvarða, t.d. Bradford-kvarða, þjónusta trúnaðarlækna og fleira, þar sem áhersla er lögð á samræmt verklag til að bregðast við veikindafjarvistum, styðja við starfsfólk og stuðla að velferð þess og vellíðan á vinnustað.
Tengt efni:
- Krafa um tilvísun til sjúkraþjálfara afnumin og verklagi breytt
- Sálfræðiþjónusta við fullorðna – gildistími tilvísana tvöfaldaður
- Tilvísun ekki lengur forsenda greiðsluþátttöku vegna þjónustu sérgreinalækna við börn
