Ragnar Þór Ingólfsson, félags- og húsnæðismálaráðherra, hefur birt frumvarpsdrög í samráðsgátt stjórnvalda sem fela í sér að Gæða- og eftirlitsstofnun velferðarmála (GEV) fái hliðstæðar lagaheimildir og embætti landlæknis hvað varðar rannsókn alvarlegra atvika. Með lagabreytingum árið 2024 fékk embætti landlæknis slíkar heimildir til rannsóknar á alvarlegum atvikum í heilbrigðisþjónustu. Væntanlegu frumvarpi er ætlað að tryggja að fagleg rannsókn á alvarlegum atvikum í félagslegri velferðarþjónustu hafi sömu stöðu.
- Markmið frumvarpsins er að bæta við lögin heimildum til handa GEV að framkvæma rannsóknir á alvarlegum óvæntum atvikum í starfsemi þeirra þjónustuaðila sem falla undir eftirlit stofnunarinnar. Jafnframt er skerpt á meðferð og niðurstöðum mála sem varða tilkynningar um slík alvarleg, óvænt atvik.
- Sérstaklega er lagt til að skýrslum GEV um rannsókn einstakra alvarlegra óvæntra atvika verði ekki beitt sem sönnunargögnum í sakamálum og er sú tillaga í samræmi við þá skipan sem komið var á innan heilbrigðisþjónustunnar með lögum nr. 103/2023.
- Jafnframt er gerð tillaga um að óheimilt verði að nota upplýsingar sem starfsmaður þjónustuveitanda eða aðrir hafa veitt stofnuninni sem sönnunargagn í sakamáli sem höfðað er gegn starfsmanni sem og að ekki megi afhenda gögn sem geyma framburð starfsmanns þjónustuveitanda eða annarra í viðtölum við GEV.
„Með þessu er brugðist við eindregnum ábendingum sem meðal annars hafa komið fram hjá umboðsmanni barna um að GEV þurfi ríkari heimildir til þess að rannsaka mál óháð rannsókn lögreglu. Markmiðið er að reyna að tryggja að alvarleg atvik endurtaki sig ekki og að draga megi faglegan lærdóm af þeim. Til þess verður GEV að hafa þær heimildir sem frumvarpið veitir,“ segir Ragnar Þór Ingólfsson, félags- og húsnæðismálaráðherra.
Frestur til að gera athugasemdir við frumvarpsdrögin er til 16. febrúar nk.
Umræða
