Garðaskóli er sigurvegari Fjármálaleikanna 2026 og fær þar með titilinn Íslandsmeistari grunnskóla í fjármálalæsi 2026. Um 2000 nemendur í 50 grunnskólum þvert á landið tóku þátt í keppninni og svöruðu fjölbreyttum og skemmtilegum spurningum um fjármál.
Efstu þrjú sætin skipa:
-
- Garðaskóli
- Grunnskóli Fjallabyggðar
- Vogaskóli
Verðlaunin voru 250.000 kr. sem renna til Garðaskóla auk þess sem skólinn sendir tvo nemendur til Brussel til að keppa fyrir hönd Íslands í Evrópukeppninni í fjármálalæsi.
Sem fyrr var mikil samkeppni um efstu sætin og er sérstaklega ánægjulegt að sjá góða þátttöku og liðsheild fjölmennra skóla. Megin markmiðið með keppni sem þessari er að leyfa sem flestum nemendum á grunnskólastigi að taka þátt í skemmtilegum leik um fjármál auk þess að minna á mikilvægi góðs fjármálalæsis.
Fjármálavit óskar sigurvegurunum og öllum þeim sem tóku þátt til hamingju með góðan árangur og þakkar fyrir þátttökuna – án þátttakenda er engin keppni!
Þrír efstu skólarnir fá peningaverðlaun auk þess sem Garðaskóli sendir tvo fulltrúa í Evrópukeppni í fjármálalæsi sem fram fer í Brussel 18. – 19. maí næstkomandi. Úr hópi nemenda voru þrír heppnir dregnir út sem fá 30.000 kr. hver og koma þeir úr Tjarnarskóla, Lundarskóla og Víkurskóla.
