Bæring Ólafsson, fyrrverandi forsetaframbjóðandi styður Guðmund Franklín Jónsson sem næsta forseta Íslands
Forsetinn þarf að leiða þjóðina inn í framtíðina og taka á spillingunni og vernda auðæfi þjóðarinnar. Til þess þarf frambjóðanda með reynslu, kjark, hugrekki, dugnað, getu og hæfni til starfsins

,,Ef þú ert bara ánægð(ur) með kerfið, spillinguna, ójöfnuðinn og aðgerðaleysi á Íslandi og vilt bara óbreytt ástand sem fer þó versnandi með hverju árinu sem líður, þá auðvitað kýst þú sitjandi forseta til áframhaldandi setu á Bessastöðum í sínu aðgerðaleysi og röngu ákvarðanatökum.

Þjóðin þarf forseta sem verndar hana gegn spillingu og arðráni

Ef þú hins vegar vilt breytingar og að forsetinn leiði þjóðina inn í framtíðina og taki á spillingunni og verndi auðæfi þjóðarinnar þá þarf til þess frambjóðanda með reynslu, kjark, hugrekki, dugnað, getu og hæfni til starfsins. Forseta með óbilandi trú á landi og þjóð, tilbúinn að taka á öllum stóru málunum og nota forsetavaldið að fullu til að virkja almenning með auknu lýðræði og þátttöku í þjóðaratkvæðagreiðslum, þá kýst þú Guðmund Franklín sem forseta.

Guðmundur Franklín mun láta verkin tala

Ég styð Guðmund Franklín til forseta, hann mun láta verkin tala.“ Segir Bæring Ólafsson, fyrrverandi forsetaframbjóðandi. Hann var forstjóri og framkvæmdastjóri hjá Coca Cola International og bauð sig fram til forseta síðast. Hann er frá Patreksfirði og er fæddur árið 1955. Samkvæmt tilkynningunni sem hann sendi þá frá sér um framboð sitt, telur Bæring að forseti Íslands eigi að vera óháður stjórnmálaöflum og hagsmunasamtökum svo hann geti tekið sjálfstæðar ákvarðanir sem varði hagsmuni þjóðarinnar.

„Sem forseti Íslands mun Bæring beita sér fyrir að styðja aukið lýðræði, hvetja ungt fólk til aukinnar menntunar og nýsköpunar, stuðla að öflugu menningarlífi, styðja og styrkja heilbrigðisstéttina og málefni aldraðra og öryrkja. Einnig mun hann leggja áherslu á sjálfbærni í nýtingu auðlinda,“ sagði í tilkynningu hans er hann var sjálfur í framboði.

Glæsilegur ferill Bærings Ólafssonar

Þá sagði einnig að Bæring hafi unnið sig til æðstu metorða í starfi á Íslandi, í Bandaríkjunum, Evrópu og í Asíu á síðustu 25 árum. Hann hafi víðtæka reynslu á stórum markaðssvæðum og verið ábyrgur fyrir fyrirtækjum með allt að 17 þúsund manns í vinnu og með árlega veltu frá 150 til 450 milljörðum króna.

„Bæring telur að reynsla sín, þekking og kraftur, jafnt af erlendum og innlendum vettvangi, muni koma að góðu gagni fyrir þjóðina. Honum finnst þjóðin þurfa á að halda sterkum og reyndum leiðtoga sem er heiðarlegur, hæfur, traustur og óháður. Hann mun kappkosta að hlusta ætíð á þjóðina og hafa hagsmuni hennar að leiðarljósi.“ sagði í kynningu hans á framboði sínu.

Bæring er fæddur á Patreksfirði 22. nóvember 1955. Á yngri árum starfaði hann m.a. við sjómennsku, í byggingaiðnaði og sölumennsku. Árið 1984 fluttist hann til Oregon og stundaði þar nám í viðskiptafræði við University of Oregon til 1987. Bæring er giftur Rose Olafsson bæjarstjóra og á sex börn og sex barnabörn.