,,Mikið áhorf á þennan þriðja þátt sýnir, svo ekki verður um villst, að sjónvarpsþáttagerð er afar hentug og árangursrík leið fyrir fyrirtæki að miðla upplýsingum til almennings“ segir í auglýsingu Samherja
Samherji hf. hefur auglýst á heimasíðu sinni að rúmlega 85.000 manns hafi horft á nýjasta þátt fyrirtækisins sem hafa verið mjög umdeildir. Nafn þessa þáttar er: Samherji – Óheiðarleg vinnubrögð Ríkisútvarpsins. Mikið hefur verið fjallað um það í flestum fjölmiðlum að verið sé að hártogast yfir því hvort vinnuskjal Verðlagsstofu skiptaverðs um meint svindl Samherja vegna meintrar fölsunar á verði á karfa. Sé skýrsla eða töflureiknir, sem flestum þykir vera aukaatriði og sumir segja smjörklípa. Um niðurstöðu vinnuskjalsins er staðfest af RÚV að um meint svindl var um að ræða en Samherji heldur öðru fram í þættinum. Verðlagsstofa gaf út yfirlýsingu á dögunum um að skjalið hefði fundist í fórum hennar og gekkst við skjalinu. Um er að ræða átta ára gamalt mál og nú fyrst er það til umfjöllunar í þáttum Samherja, ekki hefur komið fram hvort þættir verði einnig gerðir um mál fyrirtækisins vegna fréttaskýringaþátta RÚV um málefni fyrirtækisins í Namibiu.
Í auglýsingu Samherja hf. segir:
Alls hafa rúmlega 85.000 manns horft á nýjasta sjónvarpsþátt Samherja en um er að ræða einn af þremur þáttum sem fyrirtækið hefur sent frá sér að undanförnu.
Í umræddum þætti fjallar Þorsteinn Már Baldvinsson, forstjóri Samherja, um vinnuskjal sem nýverið fannst hjá Verðlagsstofu skiptaverðs. Áður hafði Samherji fengið staðfest skriflega frá Verðlagsstofu að skjalið, sem var ítrekað nefnt skýrsla í umfjöllun Ríkisútvarpsins, hefði aldrei verið unnið hjá stofnuninni.
Þátturinn fór í sýningu á YouTube fimmtudaginn 27. ágúst og á fjórum sólarhringum hafa rúmlega 85.000 manns horft á hann. Mikið áhorf á þennan þriðja þátt sýnir, svo ekki verður um villst, að sjónvarpsþáttagerð er afar hentug og árangursrík leið fyrir fyrirtæki að miðla upplýsingum til almennings.
Með breytingum sem hafa orðið á fréttaneyslu, ekki síst með tilkomu samfélagsmiðla og miðla eins og YouTube, hafa fyrirtæki og stofnanir í auknum mæli horft til þáttagerðar í því skyni að koma upplýsingum á framfæri, í stað þess að reiða sig eingöngu á ritaðar fréttatilkynningar. Er sú þróun komin talsvert lengra erlendis en aðferðin virðist vera að festa rætur hér á landi.
