Í dag opnaði mennta- og barnamálaráðherra nýjan vef MEMM. Þar er að finna safn af gagnlegum verkfærum til stuðnings við skóla- og frístundastarf þegar kemur að menntun, móttöku og vinnu með fjölbreytta menningu og tungumál.
Vefurinn er hluti þróunarverkefnis MEMM sem hefur það að markmiði að stuðla að inngildingu barna með fjölbreyttan tungumála- og menningarbakgrunn og þróa ráðgjöf, stuðning og verkfæri innan Miðstöðvar menntunar og skólaþjónustu sem eru aðgengileg á landsvísu. Hluti verkefnisins felst í að greina hindranir og skapa lausnir til að standa betur að móttöku og menntun meðal annars með því að bjóða upp á fjölbreyttari leiðir í framhaldsskólanámi.
Í haust hófst nýtt lotunám fyrir nýkomna nemendur af erlendum uppruna við Fjölbrautarskólann í Ármúla. Með því hafa nýkomnir nemendur sem eru byrjendur í íslensku tök á að innritast mjög fljótlega eftir komuna til landsins og hefja undirbúning að frekara námi. Þá hafa fjórar nýjar íslenskubrautir verið teknar í notkun í framhaldsskólum landsins undanfarin misseri.
Aðgerðirnar eru liður í menntastefnu stjórnvalda til ársins 2030.
„Ég bind vonir við að þessi aukni stuðningur nýtist börnum sem eru að feta sig í nýju samfélagi sem og kennurum og öðrum sem veita þeim leiðsögn. Fyrirbyggja þarf að þessi hópur barna einangrist, detti úr skóla og falli í vítahring fátæktar,“ segir Guðmundur Ingi Kristinsson.
MEMM stendur fyrir menntun, móttaka, menning og er þróunarverkefni leitt af mennta- og barnamálaráðuneytinu í samstarfi við Reykjavíkurborg og Miðstöð menntunar og skólaþjónustu. Mennta- og barnamálaráðuneytið gaf í dag út áfangaskýrslu um framvindu MEMM verkefnisins þar sem farið er yfir framkvæmdina, mælikvarða og næstu skref.
Vefur MEMM er ætlaður kennurum og starfsfólki í skóla- og frístundastarfi. Tilgangurinn er að miðla gagnlegum verkfærum, fræðslu og hugmyndum sem styðja við menntun barna með fjölbreyttan tungumála- og menningarbakgrunn.
„Vefurinn verður áfram í vinnslu þannig að við sem menntasamfélag getum tekið höndum saman um að vinna saman að því að bæta aðgengi að upplýsingum, ráðgjöf og gagnlegum leiðum sem meðal annars verður hægt að nýta í kennaranámi og starfsþróun starfandi kennara,“ sagði Guðmundur Ingi í ávarpi sínu.
Samhliða eru tengiliðir farsældar komnir í alla skóla sem tengja nemendur og foreldra við þá þjónustu sem á við hverju sinni þegar áskoranir gera vart við sig með snemmtækt inngrip að leiðarljósi. „Saman mynda þessi úrræði sterkan grunn fyrir bætta móttöku barna af erlendum uppruna,“ segir Guðmundur Ingi.
.jpg)
Að lokum vekur mennta- og barnamálaráðuneytið athygli á málstofu MEMM: Samhæfing og samvinna í málefnum barna með fjölbreyttan tungumála- og menningarbakgrunn sem fer fram sem hluti af Menntakviku 2025 á morgun, föstudag kl. 10:45-12:15 í S-237 (2. hæð suðurálma).
