Fréttastofa RÚV hafði samband við helstu stuðningsaðila Miðflokksins

Fréttastofa Ríkisútvarpsins hafði á dögunum samband við helstu aðila sem veittu Miðflokknum fjárhagsstuðning fyrir síðustu kosningar, bæði fyrirtæki og einstaklinga, og spurði hvort þeir hygðust styðja flokkinn áfram.
Frá þessu er skýrt á vef Viðskiptablaðsins. Þar segir að langflestir hafi svarað spurningunni játandi, sem kunni að útskýra af hverju fréttin af niðurstöðu þessarar könnunar ríkisfjölmiðilsins hefur aldrei verið sögð.
Í skoðanadálk Viðskiptablaðsins segir ennfremur:
„Þó að mikið hafi gengið á í pólitíkinni í gegnum tíðina muna Hrafnarnir ekki eftir því að svona könnun hafi verið framkvæmd áður – og þó muna þeir margt. Nú er bara að bíða og sjá hvort fjárhagslegir stuðningsmenn Samfylkingarinnar megi eiga von á samskonar símtali frá ríkisfréttastofunni áður en Ágúst Ólafur Ágústsson snýr til baka á þing.“