Formaður Sjálfstæðisflokksins telur lágmarksframfærslu duga öldruðum og öryrkjum

„Ég er ekki viss um að það sé sátt um það hjá þjóðinni. Að það sé meiri hvati til að vera innan bótakerfisins en á vinnumarkaði,” sagði Guðrún Hafsteinsdóttir formaður Sjálfstæðisflokksins í dag í umræðum um frumvarp félags- og húsnæðismálaráðherra um að greiðslur almannatrygginga hækki árlega í takti við launavísitölu.

Hvað þýðir þetta? “Að það sé meiri hvati að vera innan bótakerfisins“ en segjum … að vera aldraður eða öryrki?

Og Guðrún opinberar sýn sína á hlutverk almannatryggingakerfisins:

„Við erum auðvitað öll sammála um markmiðið, við viljum standa með eldra fólki og öryrkjum. En þarna er verið að breyta hlutverki bóta úr því að tryggja lágmarksframfærslu, sem hefur verið hlutverk bótakerfisins, yfir í að bótakerfið eigi að fylgja meðallaunum.“

Já hún vill “standa vörð” ….um að tryggja “lágmarksframfærslu” … með öðrum orðum að fólk sem hefur enga innkomu nema frá almannatryggingum skrimti. Ekki meira en það.

Sjálf rétt skrimtir hún á aumlegum tveimur milljónum á mánuði og safnar í digra lífeyris- og séreinarsjóði og sér ekki fram á að láta sér nægja “lágmarksframfærslu” í ellinni. Hún er í öruggri höfn.

Guðrún og félagar hennar í SjálfstæðisMiðflokknum töluðu sig rænulaus í 150 klukkustundir í vor og sumar til að verja ríkustu fimm fjölskyldur landsins sem lúra á 600 þúsund milljónum í eigið fé. Nú á að blaðra sig ringluð og hás til að koma í veg fyrir að greiðslur til eldri borgara og öryrkja fylgi launaþróun.

Það getur ekki verið ljósara hvar hagsmunirnir liggja,

Í dag eru fullar greiðslur almannatrygginga um 110.000kr MINNI en LÆGSTU mánaðarlaun og munurinn hefur aukist ár frá ári undanfarin áratug. Frumvarpinu er ætlað að stöðva þessa kjaragliðnun.

En nei, það gengur ekki að mati Guðrúnar og félaga hennar í MiðSjálfstæðisflokknum:

„Ég hef mjög miklar áhyggjur af þessu frumvarpi og af öllum vondu málum ríkisstjórnarinnar finnst mér þetta það versta,“ segir iðnrekandinn sem fær góðan arð af Kjörís auk launa sem eru um átta sinnum hærri en “lágmarksframfærslan” sem hún vill standa vörð um fyrir þá sem hafa enga innkomu umfram greiðslur almannatrygginga.

Því um það snýst málið. Það snýst ekki um að fólk „kjósi frekar að verða gamalt eða öryrkjar“ en að vinna vegna þess að greiðslur almannatrygginga eru svo rausnarlegar.

Hvers vegna skyldi Sjálfstæðisflokknum hafa verið hafnað í síðustu kosningum? Fyrir ótakmarkaðan náungakærleik sinn? Varla.