Málafjöldi maímánaðar er áþekkur fyrri mánuðum ársins, en 560 máls eru skráð til úrvinnslu hjá embætti lögreglunnar á Norðurlandi vestra í maí. Þrátt fyrir sambærilegan málafjölda var meira um þung mál en undanfarna mánuði.
Umferðartengd mál voru eftir sem áður fyrirferðarmikil hjá lögreglu en venju samkvæmt er nokkur fjölbreytileiki í málum almennt. Mikið var um að vera í umdæminu og ber þar helst að nefna úrslitaleiki í körfubolta sem höfðu nokkur áhrif á störf lögreglunnar í mánuðinum.
Lögreglan var til aðstoðar við borgana í 20 málum, í öllum nema tveimur þeirra var um að ræða aðstoð vegna ölvunar einstaklinga. Í flestum tilvikum var fólk aðstoðað við að komast til síns heima og í einhverjum tilvikum reyndist ekki unnt að koma fólki í heimahús, og því gistu viðkomandi í fangageymslu vegna ölvunarástands. Þá var lögregla til aðstoðar við opinbera aðila í 15 málum, mikill meirihluta málanna voru vegna skráningar á lögheimili og staðfestingu skilríkja erlendra ríkisborgara. Að auki aðstoðaði lögregla félagsmálayfirvöld í einhverjum málum þar sem áhyggjur voru af borgurum.
Óskað var eftir aðstoðar lögreglu vegna húsdýra líkt og í fyrri mánuðum, en kallað var til aðstoðar lögreglu vegna lausagöngu hrossa og sauðfjár 10 sinnum í mánuðinum, í flestum tilvikum var um að ræða lömb er sloppið höfðu úr girðingum.
Skráð voru tæplega 60 mál er varða eftirlit með útlendingum en lögreglan hefur ríka eftirlitsskyldu með þeim útlendingum sem höfð eru afskipti af og leita aðstoðar lögreglu. Flest slík afskipti í mánuðinum sem leið eru tilkomin vegna hraðaksturs líkt og í fyrri mánuði.
Eigendur tveggja bifreiða voru boðaðir til skoðunar með bifreiðar sínar þar sem lögbundinn frestur til þess var liðinn. Þá voru ökumenn 25 bifreiða sektaðir vegna ólöglegrar lagningar sem er nokkur aukning frá fyrri mánuði.
Forvarna- og fræðsluverkefni voru 15 talsins og voru þau mjög fjölbreytt. Samráðsfundur Öruggara Norðurlands vestra var haldinn í Ljósheimum þar sem sameiginleg forvarnaáætlun hagaðila á Norðurlandi vestra, FORNOR, var til umræðu. Formlegar og óformlegar samverustundir voru með ungmennum á svæðinu, lögreglumenn tóku þátt í styrktarhlaupi til styrktar Einstökum börnum, lögregla var til aðstoðar við hjálmaafhendingu Kiwanis og útskriftarhópur Húnaskóla mætti til fræðslu lögreglu og sýslumanns síðasta skóladaginn.
Alls voru 150 ökumenn kærðir fyrir of hraðan akstur, langflestir líkt og áður á 110-120 km hraða. Þónokkrir ökumenn óku yfir 120 km hraða, og nokkuð margir yfir 130 km hraða. Sá sem hraðast ók mældist á 167 km hraða. Viðurlög við slíkum hraðakstri eru sekt upp á 250.000 kr., 3 punktar í ökuferilsskrá og svipting ökuréttar í 3 mánuði. Vert er að minna á að slík háttsemi er gríðarlega hættuleg, bæði fyrir þá er sitja í bifreiðinni og þá er kunna að verða á vegi hennar.
Afskipti voru höfð af þremur ökumönnum vegna gruns um akstur undir áhrifum áfengis- og/eða vímuefna og mega þeir búast við sviptingu ökuréttar.
Tilkynnt var um tjón ljósleiðara, nokkuð oft barst tilkynning til lögreglu frá vegfarendum aksturslag bifreiða víða um umdæmið en þá var einnig tilkynnt um særðan sel, rafmagnsbíl fastan í hleðslustöð, mögulegan ölvunarakstur, börn að leik á þaki húss og möguleg tilboð á fíkniefnum svo eitthvað sé nefnt. Þá var tilkynnt um tvö slys, annars vegar þar sem barn slasaðist við leik og var flutt með sjúkrabifreið til frekari aðhlynningar.
Þá voru nokkur mál er varða möguleg brot á hegningarlögum, tilkynnt var um hótanir og brot á vopnalögum, tilkynnt var um líkamsárás sem og kynferðisbrot gegn ungmenni. Slík mál eru ávallt unnin í góðu samstarfi viðeigandi barnaverndaryfirvalda og lögreglu, þar sem skýrslutaka brotaþola fer fram í Barnahúsi.
