Sigmundur Davíð Gunnlaugsson formaður Miðflokksins segir að stjórnarandstaðan hafi náð saman um að bæta þær tillögur sem ríkisstjórnin lagði fram en varð fyrir miklum vonbrigðum með að allar tillögur stjórnarandstöðunnar voru felldar, bara vegna þess hvaðan tillögurnar komu. Engar skýringar voru gefnar á þessu háttarlagi ríkisstjórnarinnar sem stóð saman í því að fella allar tillögur stjórnarandstöðuflokkanna, sem væri skrítið á þessum tímum þegar rétt væri að sýna samstöðu.
Sigmundur Davíð segir að það megi alltaf gera hlutina betur og t.d. mætti koma betur fram við það fólk sem vinnur við velferðaþjónustu og nú sé komið bréf frá fyrirtækjum í velferðarþjónustu sem væri í raun bara neyðarkall til þess að þau fyrirtæki hefðu bolmagn til að borga sínu fólki mannsæmandi laun. 
Sammála Sigmundi Davíð
Logi Einarsson formaður Samfylkingarinnar er sammála Sigmundi Davíð og tekur undir hvert orð og sagðist vilja bæta því við að tillögurnar hefðu verið á breiðum grunni og nefndi sérstaklega að það þyrfti að passa upp á fólkið í landinu, atvinnuleysisbætur og kjör þeirra lægst launuðu og almennar bætur þyrftu að hækka.
,,Þetta má ekki verða eintómur ríkisstuðningur fyrir stórfyrirtæki og þá vel stæðu“ segir Logi.
Vonbrigði með aðgerðarpakka ríkisstjórnarinnar
Þórhildur Sunna Ævarsdóttir þingmaður Pírata, tekur einnig undir og lýsir yfir vonbrigðum með aðgerðarpakka ríkisstjórnarinnar og sagði m.a. að ríkisstjórnin væri rekin sem ölmusukerfi og Þórhildur talaði jafnframt fyrir borgaralaunum og grænum lausnum og nýjum áherslum.
Engin femínisk verkefni væru á dagskrá ríkisstjórnarinnar eða grænar lausnir.
Niðurfelling á tryggingagjaldi
Þorgerður Katrín Gunnarsdóttir formaður Viðreisnar gagnrýnir ríkisstjórnina einnig og segir að 70% af fyrirtækjum á Íslandi væru lítil og hún vill að tryggingagjaldið væri strax fellt niður og aðgerðarpakkinn væri ófullnægjandi.
Það þurfi að verja störfin og fyrirtækin.
Við þurfum að taka djarfar ákvarðanir og skuldsetja ríkissjóð verulega. Við þurfum að passa upp á að skilja fyrirtækin ekki eftir mjög skuldsett. Ferðaþjónustuna og minni og meðalstór fyrirtæki.
Fólk er skelfingu lostið
Guðmundur Ingi Kristinsson þingmaður Flokks fólksins furðar sig á því að eldri borgarar eru algerlega skildir eftir af hálfu ríkisstjórnarinnar. En það sé verið að borga aðeins 20.000 krónur til öryrkja sem þyrftu að vera að lágmarki 50.000 krónur. Það sé þjóðarskömm að vera með fátækt á Íslandi og það þarf að taka allt kerfið í gegn og laga það, í sumum dæmum væri fólki t.d. réttar 10.000 krónur en teknar 15.000 krónur af þeim í staðinn.
Allt kerfið sé ónýtt og það þurfi að stokka það allt upp á nýtt og útrýma fátækt á Íslandi. Atvinnuleysisbætur þyrftu að hækka og hann hefði spurt Bjarna Benediktson um hví verðtryggingin væri ekki tekin úr sambandi? Allar vörur séu að hækka út af ástandinu og fólk á ekki fyrir mat út mánuðin, ,,fólk er hrætt um að missa sitt húsnæði og er bara skelfingu lostið“ segir Guðmundur Ingi Kristinsson þingmaður Flokks fólksins.
Fanney Birna fékk til sín fulltrúa sjórnarandstöðunnar í Silfrið. Þau sem komu í þáttinn voru Logi Einarsson formaður Samfylkingarinnar, Sigmundur Davíð Gunnlaugsson formaður Miðflokksins, Þórhildur Sunna Ævarsdóttir þingmaður Pírata, Þorgerður Katrín Gunnarsdóttir formaður Viðreisnar og Guðmundur Ingi Kristinsson þingmaður Flokks fólksins. Til umræðu var Covid-19 og aðgerðir stjórnvalda.
