Maður á þrítugsaldri fannst illa haldinn utandyra á Siglufirði í gær. Fimm voru í kjölfarið handteknir. Tveir eru enn í haldi lögreglu vegna rannsóknar á meintri líkamsárás. Þeir eru á fertugs- og fimmtugsaldri.
Ríkisútvarpið greindi fyrst frá málinu og þar segir að ekki hefur verið tekin ákvörðun um hvort farið verði fram á gæsluvarðhald yfir tveimur mönnum sem handteknir voru á Siglufirði í gærkvöld. Þetta segir Skarphéðinn Aðalsteinsson, aðstoðaryfirlögregluþjónn hjá lögreglunni á Norðurlandi eystra, í samtali við fréttastofu rúv.
Þar voru fimm handteknir eftir að maðurinn fannst utandyra um kvöldmatarleytið. Tveir þeirra eru enn í haldi, þeir eru á fertugs- og fimmtugsaldri.
Maðurinn, sem talið er að hafi orðið fyrir líkamsárás, var með áverka í andliti. Þeir voru ekki lífshættulegir, að sögn Skarphéðins. Maðurinn er á þrítugsaldri.
Sérsveit ríkislögreglustjóra var kölluð til aðstoðar á vettvangi í gær. Skarphéðinn segir það hafa verið metið sem svo að mögulega hafi verið um hættulega líkamsárás að ræða. Hann hefur ekki upplýsingar um hvort vopnum hafi verið beitt.
„Það er verið að taka framburð af sakborningum og fara yfir málið,“ segir Skarphéðinn, í viðtalinu, spurður um framgang rannsóknarinnar en hún er á frumstigi.
