Dagvöruvísitala verðlagseftirlitsins lækkar milli mánaða og mælist nú -0,1% í febrúar þegar fyrstu mælingar liggja fyrir. Orsök lækkunarinnar eru Heilsudagar í Nettó sem standa yfir fyrstu vikuna í febrúar. Vörurnar sem þar eru á afslætti eru fyrst og fremst vörur sem ekki fást í Krónunni og Bónus. Dagvöruvísitalan hækkaði um 0,35% í febrúar á síðasta ári þegar allur mánuðurinn lá fyrir.
Prís enn ódýrasta verslunin
Prís er enn ódýrasta verslunin í reglulegu eftirliti verðlagseftirlitsins og eru verð þar mun lengra undir verði í Bónus en heldur en verð í Bónus eru undir Krónunni. Verð í Nettó er svo skammt undan. Samanburðurinn er aðeins framkvæmdur vöru fyrir vöru, ekki á vörum sem finnast ekki í öðrum verslunum. Þetta þýðir að Heilsudagar Nettó hnika ekki stöðu verslunarinnar í samanburði við Krónuna og Bónus; það eru fyrst og fremst aðrar vörur sem nú eru á útsölu þar.
Verðhækkanir risanna á svipuðum takti og áður
Verðlag í Krónunni og Bónus hækkar í svipuðum takti og undanfarna mánuði, um 0,25% í Krónunni og 0,5% í Bónus. Verð í Bónus hefur að jafnaði hækkað meira en í Krónunni síðustu mánuði, en það skýrist ekki síst af því að vörur frá Euroshopper hafa hækkað meira en vörur frá Gestus og First Price.
Enn hækkar gos og ís
Miðað við febúar í fyrra vega hækkanir vissra birgja afar þungt. Verð í Nóa Síríus og Freyju hefur á einu ári hækkað yfir 20% og frá Kjörís um 17%, þegar meðalhækkun verðs í Bónus og Krónunni er skoðað.
Eins og verðlagseftirlitið benti á í janúar leiddu Ölgerðin og Kjörís hækkanir milli desember og janúar. Nú hafa Coca Cola á Íslandi og Emmessís bætt um betur og hækka meira en keppinautar þeirra milli desember og febrúar.
