Staðan er mestu óbreytt, sagði G. Pétur Matthíasson upplýsingafulltrúi hjá Vegagerðinni við Eyjafréttir. „Það hefur heldur bætt í núna samkvæmt mælingunni á laugardag. Það er sem sagt heldur grynnra en var, sérstakelga í hafnarmynninu.“
Veðrið framundan og ölduspáin er ekki hagstæð. „Miðað við spána í dag þá er dýpkunarveður fyrir Dísu hluta dags á þriðjudag og miðvikudag og svo aftur á föstudag og laugardag. Það þarf núna að fjarlægja um 10.000 m3 úr hafnarmynninu. Miðað við stöðuna núna þá gerum við því ekki ráð fyrir að hægt verði að opna höfnina fyrr en í byrjun næstu vikus,“ sagði Pétur í viðtalinu við Eyjafréttir.
Dísa getur unnið í ölduhæð um 1,8 m og afkastar um 5.000 m3 á dag við bestu aðstæður. Gröfupramminn getur unnið í um 1,4 m ölduhæð og afkastar svipað. „Hann verður dregin í höfnina þegar Björgun sér fram á að geta nýtt hann, ölduhæðin er yfir 1,4 m mest alla vikuna,“ sagði Pétur og sagði það mikil vonbrigði að ekki hafi gengið betur að opna höfnina, „ölduhæðin í mars spilar þar stærstan þátt en hún hefur verið okkur afar óhagstæð.“
