2.8 C
Reykjavik
Laugardagur - 28. janúar 2023
Auglýsing

Opið bréf til Borgarstjórans í Reykjavík

Auglýsingspot_img

Nýjar fréttir

Auglýsingspot_img

Opið bréf til Borgarstjóra


Borgarstjórinn í Reykjavík
Dagur B. Eggertsson
Heill og sæll
Þann 10. ágúst 2016 sendi stjórn Íbúasamtaka Miðborgar Reykjavíkur (ÍMR) Björgólfi Thor Björgólfssyni bréf vegna hestagerðisins fyrir austan hús hans að Fríkirkjuvegi 11.
Þetta gamla hestagerði hefur verið leiksvæði barna og unglinga miðbæjarins og nemenda Kvennaskólans um áratuga skeið og var lengi vel eini sparkvöllur hverfisins. Í bréfinu tjáði stjórn ÍMR þann vilja sinn að þessi hluti Hallargarðsins yrði áfram leiksvæði barna og bauðst til að veita alla þá aðstoð sem í hennar valdi stóð til að gera svæðið svo úr garði að sómi væri að.
Skemmst er frá því að segja að engin svör hafa okkur borist frá Björgólfi þrátt fyrir ítrekaðar tilraunir og því snúum við okkur til borgarstjóra til að fá upplýsingar um eignarrétt og yfirráð yfir áðurnefndu hestagerði.
Björgólfur notaði hestagerðið fyrir vinnuskúra og byggingarefni á meðan stóð á viðgerðum og endurnýjun á húsinu, en nú hefur hann látið rjúfa skarð í friðaðan vegg umhverfis gerðið og látið tyrfa svæðið en ekkert bólar á fótboltamörkum sem voru þar áður.
Við spyrjum því: Hvaða lóð var samið um við Björgólf að tilheyrði Fríkirkjuvegi 11 þegar hann keypti húsið?
Miðborgin er mjög fátæk þegar kemur að íþróttaaðstöðu og leiksvæðum fyrir börn. Ekki hefur verið reist nema eitt íþróttamannvirki í miðborginni, Sundhöll Reykjavíkur, og eins og fyrr sagði var eini sparkvöllur miðbæjarins lengi vel í hestagerðinu en nýlega bættist við sparkvöllur við Austurbæjarskóla.
Það er því tilfinnanlegt tjón fyrir hverfið og þá sérstaklega börn hverfisins ef sparkvöllurinn í hestagerðinu verður aflagður. Stjórn ÍMR æskir því liðveislu borgarstjóra til að afstýra því.
Samrit sent borgarfulltrúum og fjölmiðlum
Kær kveðja
F.h. Íbúasamtaka Miðborgar Reykjavíkur
Benóný Ægisson formaður
www.midbaerinn.is