Guðrún Karls Helgudóttir hefur verið kjörin biskup Íslands eftir síðari umferð biskupskosninganna sem lauk á hádegi í dag
Sr. Guðrún Karls Helgudóttir hlaut flest atkvæði 1060 eða 52,19%
Sr. Guðmundur Karl Brynjarsson fékk 954 atkvæði eða 46,97%
Á kjörskrá voru 2286, 166 prestar og djáknar og 2119 leikmenn.
Kjörsókn var 88,85 %
Sr. Guðrún er fædd 27. apríl árið 1969 í Reykjavík. Foreldrar hennar eru Karl Magnús Kristjánsson og Helga Einarsdóttir. Guðrún var stúdent frá Fjölbrautarskólanum í Breiðholti árið 1992 og lauk B.A. í guðfræði frá Háskóla Íslands haustið 1998 og cand. theol. frá sama skóla árið 2000.
Guðrún hafði umsjón með barnastarfi við Árbæjarkirkju og var æskulýðsfulltrúi við Akraneskirkju og Grafarvogskirkju 1999-2000. Auk þess sinnti hún ýmsum störfum í kirkjum á höfuðborgarsvæðinu með námi svo sem í Hjallakirkju og Seltjarnarneskirkju og sá um leikjanámskeið í Reykjavíkurprófastsdæmum og hafði umsjón með fermingarbarnanámskeiðum í Skálholti og Gautaborg.
Guðrún tók starfsnám í Gautaborgarstifti árin 2001-2003. Hún var jafnframt meðferðarfulltrúi í kvennaathvarfi í Gautaborg 2000-2001 og æskulýðsfulltrúi í Lunby söfnuði í Gautaborg.
Hún vígðist þann 11. janúar árið 2011 í Dómkirkjunni í Gautaborg og þjónaði í Näsets söfnuði 2004 – 2005 og í Lerums söfnuði árin 2005-2008. Guðrún varð prestur í Grafarvogssöfnuði árið 2008 og hefur þjónað sem sóknarprestur í sama söfnuði frá árinu 2016. Sr. Guðrún lauk framhaldsnámi í prédikunarfræðum frá The Lutheran School of Chicago árið 2016 og sat á kirkjujþingi í tvö kjörtímabil frá árinu 2014-2022.
Eiginmaður sr. Guðrúnar er Einar Örn Sveinbjörnsson og eiga þau tvær dætur og tvær dótturdætur.
Sr. Guðrún verður vígð í Hallgrímskirkju sunnudaginn 1. september.
