Ég kynnti mér svokallaða Verðgátt sem á að vera til upplýsingar fyrir neytendur um matvöruverð. Mér krossbrá við að sjá þessa verðskrá því hún opinberar það svart á hvítu að það er bullandi verðsamráð á matvörumarkaði á Íslandi. Lægstu verðin eru öll þau sömu hjá þremur risum á markaði.
Í starfi mínu sé ég um stór innkaup fyrir fyrirtæki og versla við helling af verslunum, bæði olíufélög, byggingavöruverslanir og margar fleiri verslanir, sem og vefverslanir. Ég starfa semsagt við það að versla inn vörur daglega og oft á hverjum degi og mjög víða.
Þar er oftast nær talsverður verðmunur á milli verslana og ég get valið hvaða verð er hagstæðast. Ef ég ætlaði að versla samkvæmt þessari verðskrá, þá skiptir nákvæmlega engu máli við hvern ég versla við af þessum þremur verslunum. Ég man þegar einn af verslunarstjórum þessara verslana lýsti því yfir í fjölmiðlum að hann ætlaði alltaf að vera einni krónu undir í verði miðað við þann næst lægsta. Það er í sjálfu sér verðsamráð og er þekkt hjá bensínstöðvunum sem notuðu sama trix til dæmis og ég hef upplifað það sama hjá skipafélögunum tveimur sem voru svo dæmd fyrir ólöglega viðskiptahætti og verðsamráð. Hér má sjá: Verðgátt Rannsóknarseturs verslunarinnar
Fákeppni og samráð um verð til neytenda sem neyðast til að versla vöruna er eitthvað sem ætti ekki að vera boðlegt árið 2023 en við íslendingar erum jú bestir og færastir í öllum heiminum og búum við sama fyrirkomulag hjá bönkunum og borgum hæstu vexti í heimi með ónýtum gjaldmiðli.
Guð blessi Ísland!
