64 sjúklingar liggja á Landspítala með COVID-19. Fjórir eru á gjörgæslu, tveir þeirra í öndunarvél. Meðalaldur innlagðra er 67 ár. Tveir karlmenn á áttræðisaldri með COVID-19 létust á gjörgæsludeild 7. mars.
- Ekki eru lengur birtar tölur um fjarþjónustu vegna þess að Heilsugæsla höfuðborgarsvæðisins og Læknavaktin hafa tekið við þeirri þjónustu.
Landspítali sinnir áfram göngudeildarþjónustu COVID-19 veikra.
Landspítali er á neyðarstigi
Í dag liggja 64 sjúklingar með COVID á Landspítala, 60 eru í einangrun með virkt smit. Fjórir eru á gjörgæslu, allir í einangrun og tveir í öndunarvél.
Í gær bættust 19 sjúklingar í COVID hópinn og 11 útskrifuðust, þar af létust tveir karlmenn með COVID á gjörgæsludeildum. Nú eru COVID sjúklingar á 14 legudeildum spítalans. Staðan á Landspítala er því áfram mjög þung.
Veruleikinn á Landspítala er í takt við útbreiðslu samfélagslegs smits sem er gríðarleg og má ætla að tíundi hver maður sé með smitandi COVID um þessar mundir. Þó að fyrir flesta séu veikindin ekki mikil og hlutfallslega fáir þurfi sjúkrahúsinnlögn þá streyma nú inn á spítalann einmitt þeir einstaklingar sem hingað til hefur verið lögð hvað mest áhersla á að verja, þ.e. ónæmisbældir og fólk með alvarlega undirliggjandi sjúkdóma s.s. hjarta- og lungnasjúkdóma og krabbamein auk aldraðra sem þola ekki álagið af sýkingunni og geta hlotið skaða af. Þeir eru í hættu á að verða fyrir færniskerðingu vegna veikindanna og að komast jafnvel ekki aftur heim til sín að meðferð lokinni.
Þetta er veruleiki sem allir landsmenn verða að gera sér grein fyrir og að ábyrgð hvers og eins er mikil gagnvart ættingjum og vinum sem standa höllum fæti heilsufarslega séð. Það er ekki bara Landspítali sem á í erfiðleikum núna heldur allt heilbrigðiskerfi landsins. Heilbrigðisstofnanir heyja nú varnarbaráttu og leita allra leiða til að komast í gegnum þessa erfiðu tíma. Mönnun og legurými eru áfram stærstu áskoranirnar.
Farsóttanefnd leggur allt kapp á að verja inniliggjandi sjúklinga fyrir smiti og að fletja kúrfuna hvað veikindi starfsmanna varðar. Því er einboðið að heimsóknarbann verður áfram þar til þessu ástandi slotar. Áfram er í höndum einstakra stjórnenda að veita undanþágur en fólk er beðið um að sýna þessu skilning og sýna jafnframt starfsfólkinu okkar hlýju og stuðning þegar þau eru að framfylgja reglum.
Áður hafði verið tilkynnt um mannabreytingar í farsóttanefnd en niðurstaðan er sú að Hildur Helgadóttir sem verið hefur verkefnisstjóri nefndarinnar tekur nú við formennsku í henni tímabundið eða þar til ráðinn hefur verið nýr yfirlæknir smitsjúkdómalækninga eða skipað hefur verið í nefndina að nýju.
Talnaupplýsingar um stöðuna á spítalanum eru birtar á www.landspitali.is.
Discussion about this post