Fréttir LRH frá 17:00-05:00 – Átta gistu í fangageymslu lögreglu í nótt
Tilkynnt var um mann sem var að reyna að komast inn á stigagang í hverfi 110 í nótt. Það fylgdi tilkynningunni að aðilinn væri æstur og óskiljanlegur. Lögreglan fór á vettvang og fannst maðurinn ekki.
Stuttu síðar barst önnur tilkynning um að sami maður hefði komist inn á heimili í sama hverfi og að hann hefði tekið þar bíllykla trausta taki. Hann ók síðan á brott á bifreiðinni. Lögregla mætti í kjölfarið hinni stolnu bifreið og var ökumanninum gefin merki um að stöðva akstur sinn, sem hann gerði ekki og hófst þá eftirför.
Eftirförin hófst í sama hverfi og bifreiðinni hafði verið stolið í og endaði í miðbænum, þar sem aðilinn var handtekinn. Mikil umferð var á þessum tíma og var akstur ökumanns stórhættulegur en hann ók á hraðanum 140-170 km/klst þar sem hámarks aksturshraði er 60 km/klst. Aðilinn einnig grunaður um akstur undir áhrifum ávana- og fíkniefna. Gistir ökumaðurinn nú fangageymslu lögreglu í þágu rannsóknar máls.
Fleiri verkefni komu á borð lögreglunnar í nótt:
Tilkynnt var um að aðili væri að skoða inn í bíla við verslunarmiðstöð í hverfi 103. Fylgdi tilkynningunni að aðilinn væri æstur og væri að öskra út í loftið. Lögregla á vettvang þar sem rætt var við aðilann og fór hann síðan sína leið aðeins rólegri.
Tilkynnt um aðila sem væri að panta sér drykki á skemmtistað í miðbænum en neitað svo á borga. Hann var kærður fyrir fjársvik.
Tilkynnt um mann í tökum hjá dyravörðum á skemmtistað í miðbænum.
Leigubílstjóri hringir og biður um aðstoð lögreglu en farþegi í bifreið hans vissi ekki hvar hann átti heima.
Tilkynnt um líkamsárás í miðbænum. Málið í rannsókn hjá lögreglu.
Tilkynnt um rafskútuslys í hverfi 101. Þar hafði aðili dottið af hjólinu og hlaut minniháttar áverka í andliti. Fluttur á slysadeild til frekari aðhlynningar.
Tilkynnt um samkvæmis hávaða í hverfi 220. Húsráðandi lofaði að lækka.
Tilkynnt um hávaða berast frá íbúð í hverfi 220. Lögregla á vettvang en þar voru húsráðendur í góðum gír að hlusta á tónleika í sjónvarpinu. Lofuðu að lækka.
Tilkynnt um ölvaðan mann til vandræða í hverfi 200.
Tilkynnt um eld í gróðri í hverfi 112. Ekkert að sjá þegar lögregla kom á vettvang.
Umræða
