Fjórir menn voru handteknir af lögreglu og sérsveit í nótt vegna gruns um að hafa mætt vopnaðir á heimili lögreglumanns og hótað honum. Héraðssaksóknari rannsakar málið.
Hópur manna mætti á heimili lögreglumanns í Reykjavík um helgina og hafði í hótunum við hann. Þetta herma heimildir fréttastofu ríkisútvarpsins sem birti fyrstu frétt af málinu. Mennirnir eru sagðir hafa verið vopnaðir hnífum.
Lögreglan á höfuðborgarsvæðinu og sérsveit ríkislögreglustjóra handtók í nótt fjóra menn á tveimur stöðum vegna málsins. Mennirnir hafa, samkvæmt heimildum fréttastofu, haft í hótunum við lögreglumanninn um nokkurt skeið. Um helgina hafi þeir síðan mætt á heimili hans og ógnað honum með hnífi. Ekki er vitað til þess að mennirnir hafi beitt vopnum.
Héraðssaksóknari, sem rannsakar mál sem snúa að ofbeldi gegn lögreglumönnum, staðfestir að mál sé til meðferðar er varðar ofbeldi gegn lögreglumanni en gat að öðru leyti ekki tjáð sig. Þá gat lögreglustjórinn á höfuðborgarsvæðinu heldur ekki tjáð sig, þegar eftir því var leitað.
