Sextán ökumenn voru kærðir fyrir of hraðan akstur í umdæmi lögreglunnar á Vestfjörðum í nýliðinni viku. Sá sem hraðast ók var á 159 km hraða þar sem leyfilegur hraði er 90 km á klst. Ökumaður var stöðvaður við akstur í Ísafjarðardjúpi. Flestir voru stöðvaðir í Strandabyggð en einnig nokkrir á Patreksfirði og Ísafjarðarbæ. Þá var einn ökumaður stöðvaður við akstur án ökuréttinda og annar ávíttur fyrir að spóla á tjaldsvæði.
Talsvert hefur verið um að ekið hafi verið á búfé á þjóðvegum að undanförnu og bárust lögreglunni á Vestfjörðum fimm tilkynningar um slíkt í síðustu viku. Eru ökumenn beðnir að hafa í huga þá hættu sem skapast af ám við sumarbeit auk þess sem talsvert eignartjón getur af þessu hlotist þar sem bifreiðar fara oft mjög illa og búfénaður drepst. Sömuleiðis eru eigendur þessa fjár hvattir til að reyna eftir fremsta megni að halda því frá vegi.
Hvalreki varð í vestanverðum Kollafirði í byrjun vikunnar. Yfir tug grindhvala voru í flæðarmálinu og var eitt dýrið sært. Það drapst skömmu síðar. Björgunarsveitin Dagrenning sigldi út að grindhvalahópnum sem var þá um 200 metra frá landi. Tveir til þrír úr grindhvalahópnum voru með skrámur á skrokknum að sögn björgunarsveitarfólks en voru sprækir og var þeim smalað út á haf ásamt hinum í hópnum.
Vinnuslys varð um borð í bát í Bíldudalshöfn á föstudag er maður fékk kaðal með miklu afli í síðuna og féll við höggið. Maðurinn var með meðvitund en fluttur með sjúkraflugi til Reykjavíkur til skoðunar og aðhlynningar. Atvikið er rannsakað af lögreglu og Vinnueftirlitinu eins og venja er.
Tilkynning barst um að menn væru að skjóta fugla á Óshlíð á laugardag. Er lögreglan mætti á staðinn viðurkenndu mennirnir að hafa verið að skjóta úr byssu en ekki á fugla. Slíkt er litið alvarlegum augum enda meðferð skotvopna bönnuð á þessu svæði sem sannarlega er útivistasvæði almennings. Var aðilunum bent á að setja sig í samband við Skotíþróttafélag Ísafjarðar sem er með skotæfingasvæðið til slíkra verka á Breiðadalsheiði.
Þá fór lögreglan í eftirlit á veitinga- og skemmtistaða á norðanverðum Vestfjörðum til að athuga hvort farið væri eftir tilmælum um sóttvarnarreglur. Engar athugasemdir þurfti að gera af hálfu lögreglunnar.
Lögreglan þurfti að hafa afskipti af aðilum vegna samkvæmishávaða frá íbúðarhúsi á Ísafirði aðfaranótt sunnudagsins sl. Fólk er beðið um að sýna nágrönnum sínum tilhlýðilega virðingu og ganga hægt og hljóðlega um gleðinnar dyr.
