Heildar greiðslukortavelta* í ágúst sl. nam rúmum 101 milljarði kr. Veltan dróst saman um 7,1% á milli mánaða en jókst um 26% samanborið við ágúst 2020. Erlend kortavelta jókst um 5% á milli mánaða og nam rúmum 24 milljörðum kr. í ágúst sl.
Heildar kortavelta Íslendinga hérlendis nam 76,9 milljörðum kr. í ágúst sl. og var 8,6% hærri en í ágúst í fyrra. Veltan dróst þó saman um 10,5% á milli mánaða en þar er um að ræða hefðbundna árstíðarsveiflu sem kemur fram frá júlí til ágúst ár hvert. Líkt og í júlí sl. skiptist innlend velta nokkuð jafnt á milli verslunar og þjónustu, 55,4% kortaveltu Íslendinga hérlendis fóru í verslun og 44,6% í þjónustu.
Samdráttur í innlendri kortaveltu á milli júlí og ágúst sl. bitnar jafnt á verslun og þjónustu. Íslendingar eyða nú minna í gistiþjónustu þegar sumarfríið er á enda en samdráttur í gistiþjónustu nam næstum 41%. Aukning mælist aftur á móti í tölvuþjónustu, um tæp 60%, sem getur gefið til kynna að landinn sé snúinn aftur til vinnu eftir frí. Þrátt fyrir árstíðabundinn samdrátt á milli mánaða þá er aukning, umfram verðbólgu, á milli ára í flestum flokkum verslunar. Kortavelta í stórmörkuðum og dagvöruverslun jókst um 6,7% á milli ára, í fataverslun um 7,2%, í byggingarvöruverslun um 7,3% og í lyfja- heilsu- og snyrtivöruverslun um 10,2% ef miðað er við ágústveltu frá því í fyrra.
Innlend verslun á netinu
Samdráttur mælist þó nær enginn í innlendri kortaveltu á netinu. 13% aukning var á milli mánaða í verslun á netinu en hún hefur aukist um 32,3% frá því í ágúst í fyrra. Óhætt er að segja að innlend netverslun sé enn í mikilli sókn en netverslun með dagvöru hefur aukist um 48,9% ef miðað er við sama tíma í fyrra.
Myndin sýnir hlutfall verslunar á netinu af heildarverslun með innlendum greiðslukortum innanlands.
Undanfarið hefur verið uppi nokkur umræða um innreið nýrra aðila á markað með áfengi í netverslun. Það verður því að teljast áhugavert að skoða þróun innlendrar áfengisverslunar á netinu en hana má sjá hér á næstu mynd. Í ágúst sl. nam netverslun með áfengi tæpum 86 milljónum kr. og var 3,3% af heildarkortaveltu í áfengisverslun þann mánuðinn.
Hlutfall erlendrar kortaveltu af heildarkortaveltu á Íslandi var tæp 24% í ágúst sl. en sama hlutfall var 13,25% í fyrra og 30,6% í ágúst 2019. Erlend kortavelta jókst lítið á milli mánaða miðað við aukningu undanfarinna mánaða en hún jókst þó um 5%. Erlend kortavelta nam rúmum 24 milljörðum kr. í ágúst sl.
Ferðamenn frá Bandaríkjunum eyða nú minna en undanfarna mánuði en eru þó ábyrgir fyrir stærstum hluta erlendrar kortaveltu hér á landi eða 38,3% miðað við veltuna í ágúst sl. Velta eykst hlutfallslega mikið á milli mánaða á greiðslukortum sem gefin eru út á Ítalíu, Spáni og Japan sem bendir til aukins fjölda ferðamanna frá þeim löndum.
Frekari upplýsingar má finna hér.
Um gögnin
Upplýsingar byggðar á kortaveltugögnum frá færsluhirðum, nánar tiltekið Valitor, Borgun/SaltPay, Kortaþjónustan/Rapyd og Netgíró. Gögnin koma frá færsluhirðum niðurbrotin á verslun og vefverslun.
Gögnin innhalda ekki einkaneyslulán (raðgreiðslur, yfirdráttur o.þ.h).
Tímabilið er almanaksmánuðir (ekki hefðbundið kortatímabil).
Gögnin innhalda bæði debet og kreditkort, einstaklinga og fyrirtækja (Fyrirtækjakort c.a. 8% af veltunni fyrir árið 2020).
Gögnin sýna þróun á breytilegu verðlagi.
