Brottfarir erlendra farþega* frá landinu um Keflavíkurflugvöll voru um 161 þúsund í nýliðnum mars samkvæmt talningu Ferðamálastofu. Um er að ræða fjórða stærsta marsmánuð frá því mælingar hófust en brottfarir í mars í ár voru um 93% af því sem þær mældust metárið 2018. Ríflega tvær af hverjum fimm brottförum voru tilkomnar vegna Breta og Bandaríkjamanna.
Bretar og Bandaríkjamenn fjölmennastir
Brottfarir Íslendinga voru tælega 40 þúsund eða 70% af því sem þær mældust árið 2018 þegar mest var.Flestar brottfarir í mars voru tilkomnar vegna Breta og Bandaríkjamanna eða um tvær af hverjum fimm (42,7%). Bretar voru um 38 þúsund talsins eða tæplega fjórðungur (23,6%) og Bandaríkjamenn um 31 þúsund eða tæplega fimmtungur (19,1%).
Bretar og Bandaríkjamenn hafa verið stærstu þjóðernin í marsmánuði síðustu tvo áratugi frá því mælingar Ferðamálastofu hófust, með örfáum undantekningum.
Brottfarir Þjóðverja voru í þriðja sæti í mars eða 6,6% af heild og Pólverjar í því fjórða (5,5%). Þar á eftir fylgdu Ítalir (4,7%), Frakkar (4,6%), Spánverjar (2,3%), Danir (2,2%), Kínverjar (2,1%) og Hollendingar (2,1%).
Brottfarir Íslendinga
Brottfarir Íslendinga voru um 39.800 í mars eða álíka margar og þær mældust í sama mánuði árið 2016 og 2017. Þegar mest var mældust brottfarir Íslendinga í marsmánuði tæplega 57 þúsund eða árið 2018. Frá áramótum (jan-mars) hafa brottfarir Íslendinga mælst um 120 þúsund eða 88% af því sem þær mældust á sama tímabili metárið 2018.
*Nánari skiptingu á milli þjóðerna má sjá undir liðnum Tölur og útgáfur/Fjöldi ferðamanna hér á vefnum.
Niðurstöður um brottfarartalningar má jafnframt nálgast í Mælaborði ferðaþjónustunnar undir liðnum Farþegar.
Talningar byggja á úrtaksmælingu gerða á tímabilinu 16.-30. nóv. Framkvæmdir í flugstöðinni á Keflavíkurflugvelli gerðu það að verkum að ekki var hægt að taka úrtak fyrri hluta mánaðarins.
Umræða
