Lögregla hefur þennan daginn sinnt ýmsum hefðbundnum verkefnum, mörg hver tengd ölvuðum aðilum miðsvæðis í höfuðborginni. Þá var tilkynnt var um aðila sem gengi berserksgang í verslun í Breiðholti, en sá var farinn af vettvangi er lögregla kom þar að. Hafði viðkomandi valdið einhverjum skemmdum og slegið til starfsmanns.
Ekki var þá öll sagan sögð úr ríki Bakkusar, því ölvaður aðili ók aftan á strætisvagn snemma í morgun. Yfirgaf viðkomandi vettvang á fæti og gaf þá skýringu að hann vildi ekki bíða komu lögreglu þar eð hann væri undir áhrifum. Þegar málið var kannað betur kom í ljós að bifreiðinni hafði verið stolið fyrr í vikunni. Vitað er hver maðurinn er og er hans nú leitað.
Tilkynnt var um líkamsárás í Garðabæ, en þar hafði starfsmaður krafist launauppbótar í samræmi við samkomulag þar um. Að sögn starfsmannsins vildi yfirmaður hans ekki virða samkomulagið og endaði kjarabaráttan að hans sögn með því að yfirmaðurinn réðist á hann. Málið er í rannsókn.
Vinnuslys varð í Hafnarfirði í morgun, þar sem starfsmaður féll niður af vinnupalli. Ekki er talið að hann sé alvarlega slasaður, en hann var fluttur með sjúkrabifreið á bráðamóttöku.
Þá var tilkynnt um slagsmál á Austurvelli upp úr hádegi og að þar væri annar aðilinn með hníf á lofti. Var sá hinn sami handtekinn og vistaður í fangageymslu og fær hann að svara til saka fyrir atferli sitt er hann verður orðinn í skýrsluhæfu ástandi.
