Katrín Jakobsdóttir, forsætisráðherra, bauð Shri Ram Nath Kovind, forseta Indlands, og Savita Kovind, forsetafrú, til hádegisverðar í Ráðherrabústaðinn á Þingvöllum. Þau ræddu loftslagsmál og möguleika Íslands og Indlands á auknu samstarfi á sviði endurnýjanlegra orkugjafa. Þá ræddu þau kynjajafnréttismál og fæðingarorlof. Að lokum ræddu þau nýafstaðnar kosningar á Indlandi og stöðu mála í Kasmír.
Hádegisverðurinn var í tengslum við heimsókn forseta Indlands. Hún hófst með formlegri móttökuathöfn á Bessastöðum í gærmorgun þar sem m.a. var undirritaður samstarfssamningur um sjávarútvegs- og fiskeldismál, samningur um gagnkvæmt áritunarfrelsi fyrir handhafa diplómatískra vegabréfa og þjónustuvegabréfa og menningarsamningur um að efla samskipti landanna á menningarsviðinu meðal annars með því að hvetja til skiptiheimsókna lista- og fræðimanna og styðja við uppsetningar sýninga, þýðingar og rekstur menningarhátíða. Þá flutti forsetinn m.a. fyrirlestur í Háskóla Íslands um áherslur Indlands og Íslands á umhverfismál og heimsótti höfuðstöðvar Marel.
