Alls hafa átta verið handteknir í þágu rannsóknar lögreglu á morðinu. Hún beinist að meintri frelsissviptingu, fjárkúgun og manndrápi.
Maður sem fannst við göngustíg í Gufunesi í Reykjavík í gær var með lífsmarki þegar hann fannst. Hann lést skömmu síðar, stuttu eftir komu á sjúkrahús. Þetta kemur fram í tilkynningu frá Lögreglunni á Suðurlandi.
Þrír hafa verið látnir lausir úr haldi lögreglu vegna manndráps aðfaranótt þriðjudags. Talið er að manninum sem lést hafi verið veittir áverkar í Þorlákshöfn. Þar var lögregla að störfum í gær og safnaði meðal annars gögnum úr öryggismyndavélum fólks og fyrirtækja.
Lögregla hafði einnig viðbúnað vegna málsins á höfuðborgarsvæðinu og veitti meðal annars konu eftirför í Kópavogi. Þar var karlmaður einnig handtekinn. Konan var handsömuð í Austurbæ í gærkvöld.
Í tilkynningunni segir að lögreglunni á Suðurlandi hafi borist tilkynning skömmu fyrir miðnætti á mánudagskvöld um að óttast væri um karlmann á sjötugsaldri sem hafði yfirgefið heimili sitt í Þorlákshöfn fyrr um kvöldið. Lögregla hóf eftirgrennslan og beindist grunur hennar fljótt að því að um frelsissviptingu kynni að vera.
Maðurinn fannst snemma í gær við göngustíg í Gufunesi í Reykjavík. Hann var þungt haldinn og lést skömmu eftir komu á sjúkrahús. Síðar í dag verður tekin ákvörðun um hvort krafist verði gæsluvarðhalds yfir þeim fimm sem eru í haldi lögreglu.
Fimm í haldi – Karlmaður látinn – Lögreglan á Suðurlandi rannsakar andlátið sem manndráp
