Er forsetanum treystandi?
Sitjandi forseti er af mörgum umdeildur og ekki bætir úr skák þegar litið er yfir hverjir styrktu framboð hans til forseta árið 2016. Fréttatíminn birti listann í haust og brá mörgum í brún að sjá hverjir voru á honum, má þeirra á meðal nefna…
…Ólaf Ólafsson dæmdan afbrotamann, Friðjón R. Friðjónsson úr miðstjórn X-D, Einar Sveinsson föðurbróður Bjarna Benediktssonar, Helga Magnússon eiganda Fréttablaðsins, Hringbrautar og DV og viðskiptafélaga konu Guðlaugs Þórs ráðherra, Heiðar Guðjónsson tengdason Björns Bjarnasonar og svo mætti lengi telja.
Þrátt fyrir að forsetinn reyni að bera fyrir sig þekkingarleysi á því hverjir styrktu hann þá sýnir listinn frá Ríkisendurskoðun svart á hvítu hverjir það voru og eiga margir bágt með að trúa því að Guðni Th. sé jafn bláeygður og hann vill meina.
Nýr forsetaframbjóðandi?
Einn þeirra sem deilt hefur á forsetann fyrir styrkveitingarnar er Guðmundur Franklín Jónsson sem lætur sig flest málefni þjóðfélagsumræðunnar varða, enda háttur manna sem hafa háa greindarvísitölu og fylgjast vel með fréttum. Guðmundur Franklín hefur fengið hundruði hvatninga um að bjóða sig fram til forseta en hann er hámenntaður og hefur m.a. mikla reynslu af viðskiptum á Wall Street.
Er Guðni Th. Jóhannesson ‚construct‘?
Þáttastjórnendur í útvarpsþættinum Harmageddon fengu Guðmund Franklín í viðtal í síðustu viku og spurðu hann spjörunum úr hvað varðar álit hans á Guðna Th. Jóhannessyni, forseta Íslands. Í þættinum komu þeir Frosti og Máni svo sannarlega ekki að tómum kofanum hjá Guðmundi Franklín en hann vill meina að Guðni Th. sé ‚construct‘ ráðandi afla í þjóðfélaginu og vitnar í því samhengi m.a. í orð Benedikts Jóhannessonar, fyrrum formanns Viðreisnar: „Nú sátum við þarna við endann, Guðni Th. og ég, rúmlega átta mánuðum eftir að ég spjallaði við hann og hvatti til forsetaframboðs með tilheyrandi plotti,“
Vafasöm ráðning forsetafrúar
Mörgum þykja þessi orð eflaust umdeild og jafnvel bera vott um að ekki sé allt með felldu en það var fleira sem þarna kom fram sem velta má vöngum yfir. Eitt þeirra atriða var ráðning forsetafrúarinnar, Elizu Reid, til starfa hjá Íslandsstofu fyrir yfir hálfa milljón á mánuði en svo vill til að Friðjón R. Friðjónsson, fyrrum kosningastjóri Guðna Th. situr þar í stjórn. Þetta þykir svo umdeilt að meira að segja Egill Helgason sjálfur nefnir í lofpistli sínum um Guðna að „þetta sé svona aðeins á mörkunum.“
Er forsetinn ESB-sinni?
En eru þá öll kurl kominn til grafar, er forsetinn að öðru leyti hvítþveginn? Svo virðist því miður ekki vera því þeir Íslendingar sem ekki vilja ganga í ESB fella sig eflaust ekki við að forsetinn sagði í útvarpsviðtali fyrir síðustu kosningar að hann myndi kjósa með Evrópusambandinu ef samningurinn væri klár og aðildin borin undir þjóðina. Eins eru eflaust margir sem kunna því illa að forsetinn skyldi tala fyrir Svavarssamningnum í Icesave-málinu en það er sá samningur sem flestir telja að hefði komið allra verst út fyrir þjóðina.
Starfsmaður RÚV til áraraða
Guðmundur Franklín vill meina að RÚV eigi hlut í því að koma forsetanum að og gagnrýnir m.a. hvers vegna sagnfræðingur var fenginn til að tala um Panamaskjölin þegar viðskiptafræðingur eða lögfræðingur hefði verið mikið betur til þess fallinn. Segja má að hann hafi sannarlega eitthvað til síns máls því hvorug starfsgreinin er af skornum skammti í þjóðfélaginu og ætla mætti að margir hefðu verið á lausu sem hefðu fegnir viljað koma í viðtal og greina þetta stóra mál. Vill Guðmundur Franklín einnig meina að með þessum leikþætti, sem og þeirri staðreynd að Guðni Th. hafi verið í afleysingum á fréttastofu Ríkisútvarpsins til margra ára, hafi framboðið verið undirbúið og það í boði ríkisfjölmiðilsins. Hann nefnir sérstaklega að þær upplýsingar hafi aldrei komið fram fyrir kosningar en þær hafa síðan verið settar inn í ferilskrá forsetans á síðu forsetaembættisins. Ætli hann meini þá að Guðni Th. hafi verið tilraun númer tvö af hendi RÚV til að velja forseta hliðhollan ESB á eftir Þóru Arnórsdóttur?
Sex mánuðir til stefnu
Hvort Guðmundur Franklín hafi rétt fyrir sér eða ekki verður hver að meta fyrir sig en segja má að hann sé sannarlega einn af þeim sem gæti sigrað hug og hjörtu þjóðarinnar sem forsetaframbjóðandi. Maður eins og hann sem er laus við allt menntasnobb, sem talar hispurslaust og virðist í einlægni standa með þjóðinni er ekki síður verðugur frambjóðandi en forsetinn sjálfur. Aðeins sex mánuðir eru til forsetakosninganna og verður gaman að fylgjast með á næstu vikum hverjir bjóða sig fram.
