Umhverfis-, orku- og loftslagsráðherra hefur ákveðið veiðiheimildir til hreindýraveiða, gjaldskrá veiðileyfa fyrir árið 2026 og skiptingu þeirra milli sveitarfélaga, að fengnum tillögum frá Náttúruverndarstofnun.
Alls verður heimilt að veiða 936 hreindýr á veiðitímanum, 499 kýr og 437 tarfa. Um töluverða aukningu er að ræða miðað við árið í fyrra, en þá var veiðikvótinn 665 dýr. Sumarstofn hreindýra er í ár áætlaður um 5.000 dýr. Í fyrra var áætlaður sumarstofn um 4.000 dýr.
Veiðitími tarfa er frá 15. júlí til 15. september. Veiðitími kúa er frá 1. ágúst til 20. september. Á veiðisvæði 8 er heimilt að úthluta allt að 40 leyfum af kúaveiði frá 1. til 30. nóvember til þess að dreifa veiðiálagi á hjarðir á veiðisvæðinu.
Fyrstu tvær vikur veiðitímabilsins er veiðimönnum gert að forðast í lengstu lög að fella mylkar kýr svo draga megi eftir megni úr áhrifum veiðanna á kálfa. Þess í stað eru veiðimenn eindregið hvattir til að veiða eingöngu geldar kýr. Er í þessu sambandi bent á hlutverk og skyldur leiðsögumanna við að aðstoða og leiðbeina veiðimönnum við val á bráð.
Þá eru veturgamlir tarfar alfriðaðir og miðast tarfaveiði því við tarfa sem eru tveggja vetra og eldri.
Óheimilt er að veiða kálfa.
Heimildirnar eru veittar með fyrirvara um að ekki verði verulegar breytingar á stofnstærð fram að veiðum sem kalli á endurskoðun veiðiheimilda.
Líkt og fyrri ár skiptist veiðin milli níu veiðisvæða og eru mörk þeirra og fjöldi dýra á hverju svæði tilgreind nánar í meðfylgjandi auglýsingu.
Gjald fyrir úthlutun hreindýraveiðileyfis fyrir tarf er 241.600 kr. og 137.700 kr. fyrir kú.
Náttúruverndarstofnun auglýsir og sér um sölu allra veiðiheimildanna.
Hreindýraveiðikvóti ársins 2026
