Bann á klámi er „feðraveldi“

Nú ætla Píratar að afnema bann við framleiðslu kláms á Íslandi. Það er vegna þess að bannið er „feðraveldi“ og þeir eru femínistar. Þeir telja áhrif banns við framleiðslu á klámi á Íslandi hafa búið til meira „feðraveldi“ í lífi kvenna. Með því að afnema bann við framleiðslu á klámi ætla Píratar að frelsa konur.

Þeir ætla líka, á meðan þeir frelsa konur með því að afnema bann við framleiðslu á klámi, að hjálpa börnum að skilja góð samskipti og hvernig á ekki að vera „feðraveldi“. Þeir vita að bann við framleiðslu kláms er ekkert nema púrítanismi og þær konur sem eru á móti klámi bara óttalegar teprur. Svona gamaldags, kannski svona mussu-konur? Það þarf bara að frelsa þær og kenna þeim að vera ekki feðraveldi í mussu.

Þeir telja klám kynhegðun. Ekki hluta af nauðgunarmenningu, ekki iðnað sem snýst um að niðurlægja konur, brútal arðráns-iðnað sem nærist á endalausu og sífellt grófara ofbeldi gagnvart konum. Nei, bara kynhegðun. Þeir eru samt alltaf að rökræða klám sem femínistar en það er bara engin niðurstaða komin. Önnur en að kynhegðun er svo fjölbreytt og við erum svo ólík öll.

Og af því erum svo fjölbreytt í kynhegðun okkar þá er það svo að 88,2% af senum í basic klámi innihalda flengingar, „gagging“ og kinnhesta. Þeir sem beita þessari kynhegðunarnálgun eru karlar og þær sem taka við henni voru konur. Svona bara er þetta; “ Við erum gríðarlega ólík þegar kemur að kynlífi. Það er allur gangur á því hvað okkur finnst ánægjulegt.“

Heppnar við konur að eiga svona flotta karl-pírata-femínista sem vita hvar og hvenær uppræta þarf feðraveldi.

Hér er svo mynd sem ég fann á internetinu af manni sem er að berjast við feðraveldið með því að stara á tölvuna sína.