Sigurvegari í stuttmyndakeppninni Stulla í ár var Birgir Orri Ásgrímsson nemandi í Brekkuskóla. Myndin ber titillinn Sveitapiltur og þótti að mati dómnefndar bera af hvað varðar persónusköpun, myndatöku og klippingu. Birgir Orri fékk í verðlaun 100.000 krónur og er honum óskað hjartanlega til hamingju.
Einnig voru veitt verðlaun fyrir 2. og 3. sæti. Myndin The Lonely Flower var valin í 2. sætið en að henni stóðu fimm nemendur í Brekkuskóla, þeir Dagur, Kári, Konráð Birnir, Óskar og Wissam. Að launum fengu þeir 50.000 kr. Í 3. sæti var myndin Bond og peningasvikin. Höfundar hennar eru María, Agnes og Ingibjörg nemendur í Giljaskóla og fengu þær 25.000 kr. í verðlaun. Öllum þátttakendum er óskað til hamingju með árangurinn.
Stuttmyndakeppnin Stulli er árleg stuttmyndakeppni fyrir ungt fólk á aldrinum 13 til 18 ára og er á vegum Ungmenna-Hússins Rósenborgar. Keppnin var haldin við hátíðlega viðhöfn í Hömrum í Hofi fimmtudagskvöldið 11. apríl. Þátttökumet var slegið í ár en alls bárust 15 stuttmyndir í keppnina.
Hér er hægt að sjá stuttmyndirnar sem hrepptu 1.-3. sæti:
Sveitapiltur
The Lonely Flower
Því miður hefur ekki tekist að hlaða inn stuttmyndinni Bond og peningasvikin en unnið er að lausn.
