Guðmundur Ingi Guðbrandsson, umhverfisráðherra hefur dregið til baka ákvörðun forvera síns í starfi, Bjartar Ólafsdóttur, um að að auglýsa stöðu forstjóra Umhverfisstofnunar. Hefur Kristín Lind Árnadóttir verið ráðinn áfram forstjóri til næstu fimm ára. Í águst 2017 ákvað þáverandi Umhverfisráðherra Björt Ólafsdóttir að auglýsa skyldi stöðuna og tilkynnti forstjóranum um það.
Að öðru kosti hefði ráðning Kristínar Lindar Árnadóttur framlengst sjálfkrafa. Björt Ólafsdóttir kynnti þessa ákvörðun í svari við fyrirspurn blaðsins Vestfirðir, en fyrirspurnin hafði legið um hríð í ráðuneytinu. Björt skýrði ákvörðun sína á þann veg að hún vildi breyta gildandi venju sem hefur skapast, sem er sú að starf sitjandi forstjóri ríkisstofnunar er ekki auglýst, vilji hann vera áfram.
Bergþóra Njála Guðmundsdóttir, upplýsingafulltrúi Umhverfisráðuneytisins upplýsti þetta í svari við fyrirspurn blaðsins Vestfirðir sem barst fyrir skömmu. Kemur þar fram að Kristín Árnadóttir hafi verið endurskipuð í embættið þann 20. febrúar sl.
Enga tilkynningu um þessa ákvörðun er að finna á vef ráðuneytisins og virðist hún hvergi hafa verið tilkynnt opinberlega. Í lögum um opinbera starfsmenn er mælt fyrir um þessi mál og þar kemur fram að embættismenn skuli skipa til fimm ára í senn, nema annað sé tekið fram. Sé ákveðið að auglýsa embættið skal tilkynna það eigi síðar en sex mánuðum áður en ráningartíminn rennur út. Ekkert segir í lögunum að unnt sé að hætta við auglýsingu eftir að formleg tilkynning hefur verið send, eins og var gert í þessu tilviki.
Kristinn H. Guðnason, skrifar
Discussion about this post