,,Ég veit að ég er að næra túr-tröllin“
Stóra tíðablóðsmálið heldur áfram, mér til skemmtunnar og yndisauka. Í morgun birtist smá texti eftir einhvern flottan Viðskiptablaðsstrák þar sem hann fer með gamanmál til að reyna að shame-a mig fyrir að vera nastý kvenpersóna sem talar um túr. Þessi flotti strákur telur að margir bíði spenntir eftir því að Þríeykið fái spurningu frá blaðamönnum um hvernig þessi hugmynd mín um að atvinnulausar konur skrifi undir samning við Icelandair með tíðablóði svo að þær geti fengið hærri bætur samræmist sóttvarnaraðgerðum stjórnvalda. Af því túr er svo ógeðslegur og skítugur! Svona smitandi ógeðslegt konu-ógeð! Væri nú fyndið ef að Alma yrði spurð, er það ekki? Um almennt hreinlæti hjá konum sem eru á ógeðslegum túr. Hahaha. Hún er nú snar þessi Sólveig.
Ég veit að ég er að næra túr-tröllin með því að halda áfram að tjá mig um túrmálið en ég bara get ekki hamið mig: Þetta er nú meira feðraveldis-ruglið. Hvað er eiginlega að mönnum? Er þetta ekki eitthvað svona Freud-ískt móment (ekki að ég viti mikið um Freud og móment kennd við hann), ég bara spyr? Og hvar hafa þessir menn eiginlega verið? Þessi flotti strákur virðist eldri en tvívetra en hann er samt eins og barn þegar kemur að því sem eitt sinn hét „leyndardómar kvenlíkamans.“
Hann heldur að tíðablóð sé tabú, óhreint og smitandi. Þannig að hann er kannski meira eins og maður frá síðustu öld frekar en barn. Eða þarsíðustu öld? Hann tekur þátt í að viðhalda mýtu um að túr sé óhreinn, mýtu sem að við kvensurnar héldum kannski að væri, í það minnsta á hinum frjálsu, upplýstu og menntuðu Vesturlöndum, búið að kveða í kútinn. Hann tekur þátt í því að næra eitthvað forneskju móment þar sem körlum er gert kleift að hrylla sig yfir þessu þarna niðri hjá þeim þarna konunum.
Á meðan að allt í samfélaginu og menningunni hefur verið meira og minna undirlagt af körlum og þeirra æxlunarfæra-centeruðu sýn á samskipti við konur svo lengi sem við allar munum og þekkjum, er það svo að menn virðast ekki einu sinni hafa grunþekkingu á því hvað túr er og trúa því, eins og Móse í eyðimörkinni, að hann sé smitvaldandi and-sóttvarnar horror. Og skammast sín bara ekkert fyrir að opinbera þá skoðun. Sem er sennilega af því að öllum hinum flottu strákunum sem þeir þekkja finnst þetta líka.
Ég vona að ef Alma er spurð þá noti hún tækifærið og segi okkur frá túr og konunum sem fara á hann og hvernig, ef að menn eru ekki ennþá búnir að fatta það, hann og þær gera það að verkum að mannfólk fæðist inn í veröldina. Og segi svo kannski eitthvað um að það sé kannski dálítið löngu tímabært að það sem gerist einu sinni í mánuði fyrir helming mannkyns áratugum saman sé ekki útmálað sem óhreint tabú.
Myndina fann ég á internetinu, á síðu þar sem konum og stelpum er hjálpað að skilja að þær eru ekki óhreinar af því að náttúran skapaði þær eins og þær eru. Hún er hér tileinkuð flotta stráknum á viðskiptablaðinu og öllum hinum túr-ótta mönnunum.
„Og enn meira af sóttvörnum og ef til vill almennu hreinlæti: Sólveig Anna Jónsdóttir, formaður Eflingar sem er eitt stærsta stéttarfélag landsins, hvatti í síðustu viku félagsmenn sína til að undirrita viljayfirlýsingu um þátttöku í fyrirhuguðu hlutabréfaútboði Icelandair með tíðablóði sínu. Vafalaust bíða margir spenntir eftir að blaðamaður beri upp spurningu hvort þessi hvatning samræmist sóttvarnaaðgerðum stjórnvalda á næsta blaðamannafundi Almannavarna og Landlæknis vegna veirufaraldursins.“
https://www.vb.is/skodun/skitapleisid-boston-og-hagsmunir-amgen/164082/?fbclid=IwAR1v1FEx0FU0U_66zm7cFxkfmyzZMMkSi_rxQOkPzFSQ96lloO1OXMsZ7FQ
