Minna dómsmálaráðherra og barnamálaráðherra sérstaklega á ábyrgð sína í þessum málum
Landsfundur Ungra vinstri grænna var haldinn þann 10. október s.l. á fundinum kom fram mikilvægi þess að taka málefni útlendinga og þá sérstaklega fólks sem kemur hingað í leit að alþjóðlegri vernd, föstum tökum eins og segir í fundargerð. Þess ber að geta að kerfið var harðlega gagnrýnt á dögunum þegar málefni fjölskyldu kom upp sem vísa átti úr landi sem endaði með því að hætt var við þá aðgerð vegna brotalama í málaflokki dómsmálaráðherra.
,,Sú staðreynd að aftur og aftur komi upp mál sem sýna ómannúðlega meðferð á fólki í leit að alþjóðlegri vernd er engan veginn í takt við yfirlýsingar stjórnvalda um betrumbætur í þessum málaflokki. Landsfundur UVG minnir dómsmálaráðherra og barnamálaráðherra sérstaklega á ábyrgð sína í þessum málum.
Dómsmálaráðherra hefur enn á ný lagt fram frumvarp um málefni fólks á flótta, þar sem lögð er áhersla á að vísa fólki á flótta fyrr úr landi, undir formerkjum aukinnar skilvirkni, en ekki á að leggja okkar af mörkum við að taka á móti fleirum sem þurfa að flýja heimili sín, m.a. vegna stríðsátaka, pólitískra ofsókna og loftslagsbreytinga. Við hvetjum þingmenn Vinstri grænna til að berjast af krafti á móti frumvarpinu sem gerir ekkert til að bæta hag fólks á flótta sem hingað leitar. Landsfundur UVG vill taka það sérstaklega fram í kjölfar fráleitrar umræðu dómsmálaráðherra um flóttamannabúðir hér á landi, að slíkt kemur ekki til greina af hálfu okkar.
Við viljum sjá stefnu í útlendingamálum sem byggir á mannúð og þeim sáttmálum sem Ísland er aðili að, og þá sérstaklega Barnasáttmála Sameinuðu þjóðanna. Það þarf að styrkja stoðir og samræma vinnu þeirra stofnana sem koma að málefnum útlendinga og fylgja vel eftir þeim sem hér fá vernd, þá sérstaklega með félagslegum og sálrænum stuðningi. Landsfundur UVG telur tímabært að leggja niður Útlendingastofnun í þeirri mynd sem hún er í dag og byggja upp mannúðlegra kerfi og endurskoða lista um „örugg lönd.“ Segir í landsfundargerð Ungra vinstri grænna.
Tengt efni:
Dómsmálaráðherra nefndi þann möguleika á þingi að vista fólk á afmörkuðu svæði eftir að ákveðið hefur verið að vísa því af landi brott, til að koma í veg fyrir að það týnist hér á landi.
