Frá því á miðnætti í dag, 15. mars, hafa rúmlega 1200 jarðskjálftar mælst á Reykjanesskaga. Mesta virkni hefur verið við Fagradalsfjall. Skjálfti af stærð 3,2 varð uppúr kl. 1 í nótt í Nátthaga og var það stærsti skjálftinn eftir miðnætti. Það var frekar rólegt fram á kl. 16:30, þar sem virkni jókst aftur.
Í gær 14. mars mældust rétt rúmlega 3000 jarðskjálftar á Reykjanesskaga. Stærsti skjálftinn mældist kl. 14:15 af stærð 5,4 um 2,5 km vestur af Nátthaga. Tilkynningar bárust norður frá Sauðárkróki og austur frá Vestmannaeyjum um að hann hafi fundist. Jarðskjálftar stærri en 3,0 voru 28 talsins og flestir við sunnnanvert Fagradalsfjall, en tæpur tugur skjálfta yfir 3,0 dreifðist vestar í átt að Bláa lóninu.
Hætta á grjóthruni vegna jarðskjálftavirkni á Reykjanesskaga
Kröftug jarðskjálftahrina hefur verið í gangi á Reykjanesskaga frá því að skjálfti af stærð M5,7 varð SSV af Keili þann 24. febrúar. Nokkrir skjálftanna hafa verið M5,0 eða stærri og fjölmargir hafa verið M4,5 eða stærri. Svo stórir skjálftar geta komið af stað grjóthruni og jafnvel skriðum eða snjóflóðum þar sem aðstæður eru þannig. Vitað er um grjóthrun í þessari skjálftahrinu m.a. í Þorbirni við Grindavík, úr Keili, úr Borgarfjalli, við Djúpavatnsleið og við Kleifarvatn og einnig fór talsvert af grjóti yfir gamla Suðurstrandaveginn sem nú er aflagður.
Búast má við því að skjálftavirknin haldi áfram og við þessar aðstæður ætti fólk að forðast að vera á ferð í bröttum hlíðum þar sem grjót getur losnað í jarðskjálftunum eða snjóflóð geta fallið. Áhrifin eru mest næst upptökunum, en sagan sýnir að grjóthrun getur orðið í allt að 50 km radíus út frá upptökum stórra skjálfta á Íslandi. Skjálftahrinan nú hefur að mestu verið bundin við svæðið frá Fagradalsfjalli að Grindavík og talið er að kvikugangur hafi myndast undir Fagradalsfjalli. Við það að kvika þrýsti sér inn á þetta svæði geta orðið spennubreytingar og þar með jarðskjálftar á stærri svæðum eins og hafa t.d. orðið í Grindavík og við Trölladyngju. Enn er talið mögulegt að stór skjálfti geti orðið á svæðinu milli Kleifarvatns og Bláfjalla og þá gæti orðið grjóthrun og skriður eða snjóflóð fallið á stærra svæði en vegna skjálfta í hrinunni hingað til. Áhrifasvæði skjálfta sem á upptök milli Kleifarvatns og Bláfjalla gæti náð yfir Reykjanesskaga, norður í Hvalfjarðarsveit, umhverfis Þingvallavatn og austur að Þjórsá. Á því svæði eru mörg fjöll sem eru vinsæl til útivistar, m.a. Esjan, Hengill, Ingólfsfjall, Vífilsfell, Helgafell og Keilir.
Myndina hér að neðan tók Esther Hlíðar Jensen, skriðusérfræðingur hjá Veðurstofunni, í eftirlitsflugi með þyrlu Landhelgisgæslunnar þann 24. febrúar.
