Viðskiptabankarnir hafa verið að gefa út yfirlýsingar til fjölmiðla eftir dóm í vaxtamálinu svokallaða, þar sem Neytendasamtökin höfðuðu mál vegna okurvaxta bankanna. Vexti sem voru ákveðnir einhliða af bönkum skv. svokölluðum breytilegum vöxtum sem studdust ekki við nein lögleg viðmið nema að hluta við stýrivexti.
Neytendasamtökin lýsa yfir stórum sigri þrátt fyrir að neytendum hafi aðeins verið dæmt í hag að hluta til. Bankarnir hafa lýst því yfir að dómurinn hafi lítil sem engin áhrif varðandi endurgreiðslur á ofteknum vöxtum og hafa hlutabréf í þeim hækkað duglega við dóminn og líkja dómnum nánast við vindhögg. Hér að neðan er yfirlýsing Neytendasamtakanna þar sem fyrirsögnin er ,,Sigur í vaxtamáli“ þar sem formaðurinn segir dóminn vera ,,stóran sigur fyrir neytendur.“
Sigur í vaxtamáli
Hæstiréttur kvað upp dóm í vaxtamáli sem Neytendasamtökin höfðuðu gegn Íslandsbanka.
Dómstóllinn ógilti skilmála láns með breytilegum vöxtum þar sem vísað er til annarra þátta en stýrivaxta Seðlabanka Íslands og tók þar með undir meginkröfu samtakanna. Samkvæmt niðurstöðu dómstólsins ber bönkum að miða vaxtabreytingar við skýr viðmið á borð við stýrivexti Seðlabankans. Að mati dómstólsins raskaði umræddur skilmáli jafnvægi milli réttinda og skyldna aðila samningsins til muna, lántakendum í óhag og því talinn ósanngjarn.
Breki Karlsson formaður Neytendasamtakanna sagði eftir dómsuppkvaðninguna:
„Það sem dómurinn segir í raun er að bankinn notaði ólöglega skilmála í áraraðir. Honum er það ekki heimilt lengur. Framvegis munu neytendur geta borið saman breytilega vexti því þeir verða að vera skýrir og sannreynanlegir. Þetta er því stór sigur fyrir neytendur.“
Ekki var fallist á fjárkröfu í umræddu máli þar sem vextir umrædds láns höfðu ekki hækkað meira en stýrivextir Seðlabankans á því tímabili sem ágreiningur málsins tók til.
Að mati samtakanna gætu lántakendur með lán þar sem breytilegir vextir hafa ekki þróast í samræmi við vexti Seðlabankans hins vegar átt fjárkröfu á hendur bönkunum.
Á þriðja þúsund manns hafa tekið þátt í vaxtamálinu auk þess sem samtökin nutu stuðnings VR og BSRB við málareksturinn.
100 milljarða hreinar vaxtatekjur bankannna fyrstu 9 mánuði ársins
