Dómsmálaráðuneytið hefur ákveðið að veita Sýslumanninum á höfuðborgarsvæðinu tímabundna rekstrarstyrkingu, svo hægt verði að ráðast í átaksverkefni við sáttamiðlun og sérfræðiráðgjöf.
Auk þess verða verkefni flutt til annars embættis sem hefur meira svigrúm í rekstri. Ákvörðun um flutning verkefna til annars sýslumanns var m.a. tekin til stuðnings aðgerð A.8 Stjórnsýslustöðvar ríkis í héraði samkvæmt stefnumótandi byggðaáætlun 2022-2036, enda þykir verkefnaflutningurinn vera til þess fallinn að styrkja starfsemi sýslumanna á landsbyggðinni.
Um er að ræða tímabundnar aðgerðir sem þykja líklegar til árangurs og til þess fallnar að brúa bilið þar til hægt sé að ráðast í varanlegar breytingar, með hliðsjón af niðurstöðu stefnumótunar- og greiningarvinnu málaflokksins.
Staðan á fjölskyldusviði Sýslumannsins á höfuðborgarsvæðinu hefur ekki verið eins góð og æskilegt þykir miðað við stöðu annarra sýslumannsembætta undanfarin misseri. Hefur biðtíminn eftir annars vegar úrlausn ágreiningsmála og hins vegar sáttamiðlun og sérfræðiráðgjöf, hvort tveggja á grundvelli barnalaga nr. 76/2003, verið of langur og er ljóst að óbreytt staða er hvorki ásættanleg fyrir þjónustuþega né starfsfólk embættisins.
Þó svo að embættið hafi gripið til ýmissa ráða til að stytta biðtímann og náð árangri í þeim efnum, er ljóst að liðsinni ráðuneytisins er nauðsynlegt til þess styðja embættið í þeirri vegferð. Mikilvægt þykir að mati ráðuneytisins að ráðast í þarfar úrbætur nú þegar, í stað þess að bíða þar til niðurstaða fæst í stefnumótunar- og greiningarvinnu sem nú stendur yfir í málefnum sýslumanna.
Greining á stöðu verkefna hjá sýslumönnum
Dómsmálaráðuneytið hefur undanfarið haft til skoðunar verkaskiptingu milli sýslumannsembætta landsins. Í febrúar 2024 setti dómsmálaráðherra af stað umfangsmikið verkefni við greiningu á starfsemi sýslumannsembætta landsins og mótun framtíðarstefnu fyrir málaflokkinn. Markmið vinnunnar er að bæta þjónustu við almenning, stuðla að hagkvæmari rekstri og styrkja starfsemi embættanna á landsbyggðinni, þ. á m. hlutverk þeirra sem miðstöðvar ríkisins í héraði.
Þar sem embættin eru misstór hvað varðar rekstur og verkefni, hefur ráðuneytið samhliða stefnumótun verið að greina verkefnadreifingu milli embættanna. Þá hefur ráðuneytið jafnframt haft samráð við sýslumannsembættin um leiðir til að bæta þjónustuna við almenning og tryggja jafnari verkaskiptingu og aðgengi að þjónustu embættanna.
