Kristrún Frostadóttir forsætisráðherra hefur skipað Þórarin G. Pétursson í embætti varaseðlabankastjóra peningastefnu til fimm ára frá og með deginum í dag.
Embættið var auglýst laust til umsóknar 19. september sl. og bárust sjö umsóknir en einn umsækjandi dró umsókn sína til baka. Ráðgefandi hæfnisnefnd mat Þórarin einn umsækjenda mjög vel hæfan til að gegna embættinu en aðrir umsækjendur voru ýmist metnir vel hæfir eða hæfir. Forsætisráðuneytið lagði sjálfstætt mat á störf hæfnisnefndar og umsækjendur voru allir teknir í viðtal hjá forsætisráðherra. Var það niðurstaða forsætisráðherra að Þórarinn væri hæfastur til að gegna embættinu.
Þórarinn er með Cand. Oecon próf í hagfræði frá Háskóla Íslands, meistarapróf í hagfræði frá Essex-háskóla í Bretlandi og doktorspróf í hagfræði frá Árósa-háskóla í Danmörku.
Þórarinn hefur starfað í Seðlabanka Íslands frá árinu 1994. Hann hefur verið aðalhagfræðingur og framkvæmdastjóri hagfræði- og peningastefnusviðs frá árinu 2009 og sat í peningastefnunefnd bankans á árunum 2009-2019. Áður starfaði hann m.a. sem forstöðumaður rannsóknar- og spádeildar hagfræðisviðs og sem deildarstjóri hagrannsókna. Þá hefur hann um árabil ritstýrt Peningamálum þar sem Seðlabankinn gerir grein fyrir mati sínu á stöðu og horfum í efnahags- og peningamálum.
Þórarinn býr yfir víðtækri reynslu og þekkingu á fjármálastarfsemi og efnahags- og peningamálum. Hann hefur umtalsverða reynslu af háskólakennslu í hagfræði og hefur sem aðalhagfræðingur stýrt hagfræðigreiningum og spágerð Seðlabankans. Þá hefur hann ritað fjölda fræðigreina, rannsóknarritgerða og bókarkafla sem birst hafa í innlendum og erlendum vísindaritum. Þórarinn hefur einnig mikla reynslu af alþjóðlegu samstarfi í gegnum stofnanir á borð við Alþjóðagjaldeyrissjóðinn (AGS) og Efnahags- og framfarastofnunina (OECD) og erlenda seðlabanka.
