Er þetta ekki komið út í meiðyrði?
,,Þessi uppákoma í gær var með ólíkindum, ég missti andlitið og að horfa upp á heiftina, hjálpi mér.
Ég var komin að fremsta hlunn með að bjóða henni að finna fyrir hana góðan sálfræðing. Það hlýtur að búa mikið undir þegar hvert tækifæri er notað til að draga fram viðskiptatengsl viðkomandi. Sama gerðist reyndar í Silfrinu þar sem Sigurborg gat ekki á sér setið. Er þetta ekki komið út í meiðyrði? Alla vega á þetta ekki heima í borgarstjórn svo mikið er víst. Við vorum kosin til að gæta hagsmuna borgarbúa. Held bara að borgarstjóra hafi verð skemmt, alla vega beitti hann sér ekki neitt til að stoppa þennan vitleysisgang.“ Segir Kolbrún Baldursdóttir.
Segir Eyþór Arnalds hafa þegið hundruð milljóna í mútur frá Samherja
„Það er alvarlegt mál ef hægt er að kaupa stjórnmálamann,“ sagði Dóra Björt Guðjónsdóttir í viðtali við Bylgjuna og segir að Eyþór hafi keypt hlut Samherja í Morgunblaðinu án þess að greiða fyrir hann. „Núna hafa komið fram nýjar upplýsingar um uppbyggingu Samherja á Selfossi í miðbænum og ég hef ítrekað spurt Eyþór út í það hvers vegna hann fékk mörg hundruð milljónir frá Samherja þegar hann fékk gefins hlut í Morgunblaðinu og hann hefur aldrei svarað almennilega fyrir það. Hann fer alltaf að snúa út úr og drepa málum á dreif.
Hann segir að hlutur hans í Morgunblaðinu sé alls staðar skráður en það er ekki það sem ég hef spurt um heldur hef ég spurt um peningana fyrir kaupum á hlutnum sem hann fékk gefins frá félagi sem hefur verið notað til að múta stjórnmálafólki,“ sagði Dóra Björt í viðtalinu við Bylgjuna og vísar til rannsóknar á Samherja í mörgum löndum, vegna ásakana um mútur til áhrifamanna í Namibíu í skiptum fyrir makrílkvóta. Sigurborg í sama flokki, hafði frammi sömu ásakanir í Silfrinu um síðustu helgi þar sem Eyþór var jafnframt viðstaddur,
Dóra Björt heldur áfram með ásakanir
Á vef sínum segir Dóra Björt: ,,Ég ræddi um Samherjamálið í Bítinu á Bylgjunni.
Staðreyndirnar tala sínu máli. Það liggur fyrir að Eyþór Arnalds hefur hlotið fleiri hundruð milljónir í gjöf frá Samherja í gegnum Kýpurfélag sem hefur verið notað til að múta stjórnmálafólki erlendis, sama fyrirtæki og stendur nú að uppbyggingu miðbæjarins á Selfossi.
Undirbúningur þeirrar uppbyggingar átti sér stað þegar Eyþór var oddviti Sjálfstæðisflokksins á Selfossi.
Segir Samherja hf. hafa borgað fyrir áróðursþátt
Aðalskipulag miðbæjarins er frá 2012. Þegar þetta fer í íbúakosningu þá borgar Samherji fyrir áróðursþátt sem er sektaður fyrir að hafa brotið á upplýsingarétti almennings. Mikil leynd hefur hvílt á aðkomu Samherja að þessari uppbyggingu allar götur, svo mikil að sveitarstjórnarfulltrúar á Selfossi voru ekki almennt upplýstir um hana. Ég er ekki að saka neinn um eitt né neitt en krefjast þess fyrir hönd almennings að eðlilegum spurningum sé svarað. Það er nefnilega þannig að mútur eru ekki greiddar í brúnu umslagi merktu sem mútur. Múturgreiðslur eru gjarnan dulbúnar sem viðskipti.
Fjaðrafokið áhugavert
Ég er að störfum fyrir borgarbúa og veiti aðhald fyrir þeirra hönd. Borgarbúar eiga skilið að fá svör við því hvort kjörinn fulltrúi sem fer með almannafé sé í vasanum á stórum hagsmunaaðila sem virðist eiga það til að múta stjórnmálafólki. Að sama skapi hvort hann beiti skipulagsvaldinu í eigin hag. Þetta er grundvallarspurning um traust og heiðarleg stjórnmál.“
