Upplýsingasíða fyrir ábendingar opnuð
Samkeppniseftirlitið óskar eftir sjónarmiðum vegna athugunar á stjórnunar- og eignatengslum fyrirtækja í sjávarútvegi – Upplýsingasíða opnuð
Í október síðastliðnum greindi Samkeppniseftirlitið frá ákvörðun um að hefja athugun á stjórnunar- og eignatengslum í íslenskum sjávarútvegi. Niðurstöður athugunarinnar verða settar fram í sérstakri skýrslu, en gert er ráð fyrir að hún liggi fyrir í lok árs 2023.
Vegna athugunarinnar hefur Samkeppniseftirlitið nú opnað upplýsingasíðu á heimasíðu sinni þar sem gerð er grein fyrir athuguninni, undirbúningi og framvindu hennar hingað til, auk þess sem sett er fram áætlun um tilhögun og áfangaskiptingu athugunarinnar héðan í frá (verkefnaáætlun).
Er þessari upplýsingagjöf ætlað að stuðla að gagnsæi athugunarinnar. Jafnframt er hverjum sem áhuga hefur gefinn kostur á að koma sjónarmiðum og upplýsingum á framfæri.
Á þessu stigi vinnunnar er sjávarútvegsfyrirtækjum, sem og öllum öðrum sem þess óska, gefinn kostur á að tjá sig um verkefnaáætlunina, athugunina eða annað það sem viðkomandi vill koma á framfæri við eftirlitið. Óskað er eftir að slíkar athugasemdir berist Samkeppniseftirlitinu á póstfangið samkeppni@samkeppni.is eigi síðar en 5. maí 2023.
Jafnframt er öllum gefinn kostur á að koma á framfæri ábendingum í tilefni af athuguninni, svo sem um stjórnunar- og eignatengsl sjávarútvegsfyrirtækja, innbyrðis eða gagnvart öðrum atvinnugreinum. Slíkum ábendingum er hægt að koma á framfæri í gegnum gátt á heimasíðu eftirlitsins (nafnlaust ef óskað er), eða með tölvupósti á samkeppni@samkeppni.is.
Á upplýsingasíðunni er meðal annars gerð grein fyrir eftirfarandi:
- Athugunin og að hverju hún beinist.
- Fyrirtæki og markaðir sem athugunin tekur til.
- Helstu áfangar athugunarinnar.
- Undirbúningur, skipun ráðgjafarhóps og tenging við gagnagrunna.
- Yfirstandandi gagnaöflun gagnvart sjávarútvegsfyrirtækjum.
- Framhald athugunarinnar – næstu skref.
- Lagagrundvöllur athugunarinnar.
- Heimild Samkeppniseftirlitsins til gagnaöflunar.
- Þýðing hugtaksins „yfirráð“ við greiningu á stjórnunar- og eignatengslum.
- Þýðing stjórnunar- og eignatengsla á vettvangi stjórnvalda.
Fiskistofa annast framkvæmd laga um stjórnun fiskveiða og sinnir eftirliti samkvæmt þeim. Samstarf stofnananna vegna athugunarinnar er því mikilvægt.
https://gamli.frettatiminn.is/17/04/2023/sjavarutvegssfyrirtaeki-rannsokud-ottast-eftirlitid/
