Héraðsdómur Reykjaness dæmdi í dag Halldór Loga Sigurðsson í fimm ára fangelsi fyrir stunguárás í Reykjanesbæ í júní. Hann er sakfelldur fyrir tilraun til manndráps, en hann lagði ítrekað til manns með hnífi.
Fjallað er um dóminn á vef ríkisútvarpsins og þar segir að lögregla hafi fengið tilkynningu um árásina klukkan 22.15 að kvöldi föstudagsins 20. júní. Fórnarlambið var þá með stunguáverka á hendi, hnakka og baki og var flutt með hraði á Landspítalann. Halldór Logi hafði flúið af vettvangi, en lögregla bar kennsl á hann af öryggismyndavélum. Lögregla hafði að lokum uppi á honum í heimahúsi. Þar tók kona á móti lögreglu og sagði Halldór vera að hóta henni og öðrum manni á heimilinu lífláti. Hann var síðan handtekinn án mótspyrnu að því er fram kemur í fréttinni.
,,Hann var úrskurðaður í gæsluvarðhald daginn eftir og hefur verið í haldi síðan. Í dómnum kemur fram að framburður hans hafi verið ruglingslegur við yfirheyrslur.
Í dómnum kemur fram að fórnarlambið hafi farið út af heimili sínu eftir að hafa heyrt hávaða fyrir utan og fundist eins og einhver væri að berja á bílskúrinn. Hann hafi ætlað að reka viðkomandi burt en séð mann með hníf og muni síðan ekki meira fyrr en árásin var yfirstaðin og hann verið allur í blóði.
Geðlæknir var dómkvaddur til að leggja mat á ástand Halldórs og kemur fram að hann hafi verið í geðrofi þegar hann framdi árásina og það hafi verið stór þáttur í því hvernig fór. Það sé vegna langvinnrar notkunar vímuefna. Hann hafi hins vegar verið sakhæfur á verknaðarstundu.
Hann var dæmdur í fimm ára fangelsi og gert að greiða fórnarlambinu rúmar 3,2 milljónir króna í bætur auk sakarkostnaðar og málsvarnarlauna.“ Segir í frétt Rúv.
