Fuglaflensa hefur verið staðfest í þremur villtum fuglum á landinu sem fundist hafa undarfarna daga. Um er að ræða heiðagæs við Hornafjörð, hrafn á Skeiðum í Árnessýslu og súlu rétt við Strandakirkju við Suðurstandaveg. Þá hafa heimilishænsni á bóndabæ á Skeiðum, þar sem hrafninn fannst, sýnt sjúkdómseinkenni og voru fuglarnir allir aflífaðir í dag. Sýni hafa verið tekin úr hænsnunum og er beðið niðurstöðu rannsóknar. Fuglaflensuveiran sem staðfest hefur verið í villtum fuglum er af gerðinni H5. Meinvirkni veirunnar er ekki þekkt. Beðið er niðurstaðna frekari greiningar frá erlendum rannsóknarstofum.
Þá greinir MAST frá því á vef rúv.is að starfsmenn Matvælastofnunar taki á næstu dögum sýni úr dauðum fuglum á Suðurnesjum og sunnanverðu Snæfellsnesi. Fjölmargar ábendingar hafa borist stofnuninni vegna gruns um fuglaflensu. Matvælastofnun fer nú yfir fjölda ábendinga um dauða fugla sem bárust um páskahelgina. Flestar ábendingar hafa borist af suðvesturhorninu og Suðurlandi.
Viðbragðsáætlun Matvælastofnunar um viðbrögð og varnir gegn smitandi sjúkdómum í fuglum hefur verið virkjuð.
Um fuglaflensu sjá: https://www.mast.is/is/baendur/lyfja-og-sjukdomaskraning/listi-yfir-sjukdoma-og-meindyr/fuglaflensa
Hænsfugla skyldi halda undir þaki til að draga úr líkum á útbreiðslu veirunnar. Matvælastofnun brýnir alla alifuglaeigendur til að verja þá fyrir smiti frá villtum fuglum, m.a. halda undir þaki og girða af. Sjá nánar: https://www.mast.is/is/um-mast/frettir/frettir/varnaradgerdir-gegn-fuglaflensu
Þau afbrigði veirunnar sem nú er mest um í nágrannalöndum okkar (H5N1) hafa ekki valdið sýkingum í fólki. Ekki er talin hætta á að smit berist í fólk við neyslu eggja eða kjöts af alifuglum. Líkurnar á smiti frá fuglum í fólk eru því litlar en þó er aldrei hægt að útiloka smit og fólk þarf ávallt að gæta sóttvarna við handfjötlun á veikum og dauðum fuglum.
Matvælastofnun hvetur almenning til að tilkynna um dauða villta fugla sem finnast á víðavangi ef ekki er augljóst að þeir hafi drepis af slysförum. Best er að tilkynna í gegnum ábendingarkerfi á heimasíðu Matvælastofnunar (mast.is). Þörf á sýnatöku verður metin af stofnuninni.
