Lögreglumaður talinn hafa brotist inn á heimili sitt

Nokkuð reglulega berast lögreglu tilkynningar um innbrot í heimahús á höfuðborgarsvæðinu og ein slík barst nýverið, en þá var tilkynnt um yfirstandandi innbrot í raðhúsi í umdæminu þar sem skuggalegt par á miðjum aldri hafði fundið sér leið inn í húsið gegnum bílskúrinn.
Brugðist var skjótt við og tveir lögreglumenn sendir rakleiðis á vettvang, en samtímis var haft samband við húsráðanda til að upplýsa hann um stöðu mála. Sá var í makindum heima hjá sér þegar hringt var frá lögreglunni og sá enga innbrotsþjófa á heimilinu. Reyndar var maðurinn nýkominn inn eftir að hafa farið í göngutúr með konunni sinni í slagveðri og voru þau klædd í samræmi við það. Hann sagði þau sjálf hafi farið inn um bílskúrinn og nú var ljóst að málið var á misskilningi byggt.
Nágranni mannsins, sem tilkynnti um innbrotsþjófana, hafði farið mannavillt og því var lögreglubílnum með blikkandi ljós snúið við þegar staðreynd málsins blasti við. Því má svo bæta við að húsráðandi í umræddu raðhúsi, sem er reyndar starfandi lögreglumaður á Höfuðborgarsvæðinu, hefur verið duglegur að hvetja nágranna sína til að láta lögreglu vita um grunsamlegar mannaferðir. 
Sá sem hringdi í lögregluna í þessu tilfelli brást því hárrétt við enda er betra að hringja einu sinni of oft í lögregluna með upplýsingar af þessi tagi en einu sinni of sjaldan.