Meðlimir Vöku í Stúdentaráði Háskóla Íslands, sem fara með meirihluta í ráðinu, hafa lagt fram tillögu um að lýst verði yfir vantrausti á hendur Silju Báru Ómarsdóttur, rektor Háskóla Íslands, vegna ákvörðunar um hækkun skrásetningargjalda. Tillagan verður tekin til umræðu á fundi Stúdentaráðs á morgun, þriðjudaginn 24. febrúar klukkan 17:30.
Í tillögunni kemur fram að ákvörðun um hækkun skrásetningargjalda feli í sér að fjármögnun Háskóla Íslands verði í auknum mæli færð yfir á stúdenta í stað stjórnvalda. Að mati Vöku hefur þessi þróun áhrif á aðgengi að námi og geti dregið úr jafnrétti til menntunar. Þar er jafnframt bent á að hækkunin leggi auknar fjárhagslegar byrðar á stúdenta sem þegar standa höllum fæti.
Í tillögunni er einnig vísað til þess að skrásetningargjaldið hafi ekki staðið á traustum lagagrundvelli frá því að Áfrýjunarnefnd í kærumálum háskólanema komst að þeirri niðurstöðu fyrir tæpum þremur árum að innheimta þess væri ólögmæt. Telur ráðið að sú staða geri það sérstaklega varasamt að ráðast í frekari hækkun gjaldsins.
Silja Bára Ómarsdóttir tók við embætti rektors Háskóla Íslands í júní á síðasta ári. Fundur Stúdentaráðs þar sem vantrauststillagan verður rædd er á dagskrá síðar í vikunni.
